Астана. 8 тамыз. BM.KZ/ Әсел Мәдәліқызы/ – Астана қаласының тұрғыны ұлының бірнеше рет жыныстық зорлық-зомбылыққа ұшырағанын мәлімдеді. Жәбірленушінің анасы әлеуметтік желі арқылы көмек сұрады.
Әйелдің айтуынша, оның 2-топтағы мүгедек баласы күдіктімен онлайн-ойын арқылы танысқан. Одан кейін сезікті бірнеше рет үйіне шақырған көрінеді. Сол аралықта ер адам жымысқы әрекетін қайталаған. Анасының сөзінше бұл іске 6 адамның қатысы бар. Алайда топ болып ұлына қорлық көрсеткендерге құрық болмай тұр деп қынжылады.
«Іс Нұра аудандық ПБ-да тіркелген. Бірақ іс жабылып қала жаздады. Содан кейін Астана қалалық ПД-не өткіздік. Әлі 4 ай болды тергеу жүріп жатыр. Ал зорлық болғанын дәлелдейтін сараптама қорытындысы болса да, күдікті 6 адам әлі қамауға алынбаған. Балам топтық зорлық-зомбылықтан кейін моральдық тұрғыда ауыр жағдайға түсті», — дейді жәбірленушінің анасы.
Осы жағдайдан кейін жәбірленушінің анасы инсульт алыпты. Ал баланың денсаулығы нашарлап, оған эпилепсия диагнозын қойған.
Олар тергеудің созылып жатқанына алаңдаулы және бұл әрекетті әдейі жасалып отыр деп санайды. Дегенмен қалалық полиция департаменті бұл жайтқа қатысты қылмыстық іс ашылғанын айтады.
«Қазіргі таңда жыныстық сипаттағы зорлық әрекеттері бойынша сотқа дейінгі тергеп-тексеру амалдары жүргізіліп жатыр. Тергеу аясында бірқатар сот сараптамалары тағайындалды. Сол сараптама қорытындылары негізінде процессуалдық шешім қабылданады. Барлық тергеу әрекеттері қылмыстық процесс тараптарының құқықтары мен заңды мүдделерін сақтау арқылы жүзеге асып жатыр. Өзге ақпарат тергеу мүддесіне байланысты жария етілмейді», — делінген Астана қалалық Полиция департаментінің ресми түсініктемесінде.