Астана. 11 тамыз. BM.KZ – Елімізде 239 кәсіпорын 3,5 мыңнан астам жұмысшыға 1,3 млрд теңге қарыз. Мемлекеттік еңбек инспекторлары 2025 жылғы 1 тамыздағы жағдай бойынша кәсіпорындардың осынша жалақы бере алмай отырғанын анықтаған.
Сондай-ақ, түрлі ұйымда жүргізілген тексерулер барысында еңбек құқығы бұзылуының 4 мыңнан астам дерегі тіркелген.
«Құқықбұзушылыққа жол берген кәсіпорын басшыларына 2 287 ұйғарым беріліп, 277 млн теңгеден астам айыппұл салынды. Жалақы берешегін өтеу бойынша қатаң кестелер енгізудің нәтижесінде 3,4 мыңнан астам жұмысшының құқығы қорғалып, оларға 1,1 млрд теңге төленді», – деп жазылған Еңбек және халықты әлеуметтік қорғау министрлігінің хабарламасында.
Айта кетейік, биылғы 1 тамыздағы деректер бойынша, мемлекеттік еңбек инспекторлары 3 514 тексеру жүргізіп, 4 132 олқылық анықтаған. Оның ішінде еңбек саласында – 3 465, еңбек қауіпсіздігі мен еңбекті қорғау бойынша – 648, халықты жұмыспен қамту бойынша – 19 факті тіркелген.
Жалпы, қабылданған шаралардың нәтижесінде 25 мың жұмысшының еңбек құқығы қорғалған.