БҚО. 13 тамыз. BM.KZ – БҚО-да ауыл тұрғындарының мал жаюға арналған жайылымы өздеріне қайтарылды. БҚО экономикалық соты жер дауын қарап, заңсыз берілген жерді ауылға қайтару туралы шешім қабылдады. Бұл туралы жергілікті қоғам белсендісі, БҚО қоғамдық кеңесінің мүшесі Бауыржан Ахметжан әлеумметтік желіде жазды.
Оның жазуына қарағанда, 2024 жылы Бәйтерек ауданының Болашақ ауылы тұрғындары ауыл маңындағы жайылымның жекеменшікке өтіп кеткеніне наразы болып, арызданған. Олардың айтуынша, Бәйтерек ауданы әкімдігі 217 гектар көлеміндегі жерді жеке кәсіпкер Досым Кәрімовке негізсіз берген. Бұл жердің шекарасы үлкен көлге дейін созылып жатқандықтан, малдың суға қол жеткізуіне кедергі болған.
Заң бойынша, халықтың қажетіне пайдаланылатын жайылым жекеменшікке берілмеуі тиіс. Дегенмен, 2017 жылдың 5 маусымында Кәрімов бұл жерді «шаруа қожалығын жүргізу үшін» 10 жылға жалға алған. Сөйтіп, 2022 жылдың 18 қазанында ол жерді «Аграрлық қызметі» ЖШС-не сатып жіберген.
Тұрғындардың шағымы прокуратураға жолданып, Бәйтерек ауданының прокуратурасы мен Жер ресурстарын басқару департаменті тексеру жүргізген.
Нәтижесінде 2024 жылдың 23 қыркүйегінде жердің заңсыз берілгені анықталған.
Кейін департамент заңсыз жасалған келісімшарттарды жою туралы сотқа жүгінген. Бұл уақытта ЖШС жайылым жерге қора мен үй салып қойған.
Сот 3 келісімшарттың үшеуін де, атап айтқанда:
- 2017 жылғы 5 маусымдағы Бәйтерек ауданы Жер қатынастары бөлімі мен Досым Кәрімов арасындағы жалға алу шартын;
- 2022 жылғы 18 қазандағы Досым Кәрімов пен «Аграрлық қызметі» ЖШС арасындағы сатып алу-сату шартын;
- 2022 жылғы 19 қазандағы Жер қатынастары бөлімі мен «Аграрлық қызметі» ЖШС арасындағы жалға алу шартын жарамсыз деп таныған.