Астана. 13 тамыз. BM.KZ – Мемлекет басшысы Қасым-Жомарт Тоқаевтың төрағалығымен Қауіпсіздік Кеңесінің наркотизмге қарсы іс-қимыл мәселелері бойынша отырысы өтті.
Сарапшылардың айтуынша, наркотизм ұғымы тек нашақорлықпен шектелмей, әлеуметтік, экономикалық, құқықтық және ұлттық қауіпсіздікке қатысты мәселелерді қамтиды.
Президент есірткіге тәуелді азаматтардың емдеу және сауықтыру шараларымен жеткілікті қамтылмай отырғанын атап өтіп, бұл проблеманы шешудің маңыздылығына тоқталды. Оның сөзінше, мұндай жандардың көпшілігі мен олардың жақындары жариялылықтан және қоғамның талқысынан қауіптеніп, мәселесін жасырады. Мемлекет басшысы жастар арасында есірткіні насихаттауға жол берілмеуі керектігін айтып, интернет пен медиа индустрияда тыйым салынған заттар мен ішімдікті дәріптейтін жағымсыз үрдістердің белең алғанына назар аударды.
Жиында есірткімен байланысты құқықбұзушылықты анықтау, жолын кесу және жазалаудың тиімділігін арттыру мәселелері қаралды. Президент кез келген есірткі түрінің өндірісі мен сатылымына қатаң тыйым салынып, мемлекеттің жіті бақылауында болуы қажет екенін айтты. Сондай-ақ, трансұлттық ұйымдасқан қылмысқа қарсы іс-қимылды күшейтіп, есірткі сататын орындар мен зертханалардың иелерін әшкерелеу жұмыстарын жандандыруды тапсырды.
Мемлекет басшысы күмәнді қаржы операцияларын бақылауға алудың да маңыздылығын атап өтті. Бұл бағыт құқық қорғау органдарының назарынан тыс қалмауы тиіс.
Отырыс қорытындысында Қасым-Жомарт Тоқаев наркотизмге қарсы күреске бүкіл қоғам болып жұмылудың қажеттігін атап өтіп, Үкіметке, өңір әкімдеріне және жауапты мемлекеттік органдарға нашақорлықтың алдын алу мен есірткі бизнесіне қарсы шараларды күшейту жөнінде нақты тапсырмалар берді.