Шымкент. 13 тамыз. /Нұргүл Ерғалиқызы/ BM.KZ – Түркістан облысының Шардара ауданының тұрғыны Орынкүл Нұрабаева 43 жасында дүниеге үшем әкелді. Бұл көпбалалы ананың 9-шы жүктілігі. Сәбилер Түркістан облыстық №1 перинаталдық орталығында өмірге келді.
«Алла Тағала 43 жасымда 3 ұл сыйлағаннан кейін қуаныштымын, әрине. Үшем дегенде қобалжыдым. Жүктілік оңай болмады. Жасым 43-те болғаннан кейін сәл ауырлау болды. Дегенмен Алланың берген сыйы ғой. Қиналсақ та қазір қуаныштымыз», – дейді көпбалалы ана.
Орынкүлдің бүгінде екі қызы тұрмыста, олардан 5 немересі бар. Үшеммен бірге енді ол 11 балалы болып отыр. Босанғаннан кейін нәрестелерін көріп, бар уайым-қайғысын ұмытқанын айтады. Өздері мал шаруашылығымен айналысатын отбасы.
Дәрігерлердің айтуынша, ана мен нәрестелердің жағдайы жақсы. Олар 6 тамыз күні дүниеге келген. Сол уақыттан бері неонатологтардың бақылауында болған.
«Нұрабаева жоспарлы түрде босандырылды. Қазір жағдайлары жақсы. Нәрестенің алғашқысы, Аслан есімді бала сағат 12:46-да 2 265 грамм болып туылса, Әлихан бір минуттан соң, 2 455 грамм болып дүние есігін ашқан. Бойы 48 см. Ал Әлинұр 12:48-де 2 405 грамм салмақпен туылған. Оның да бойы 48 см», – дейді №1 облыстық перинаталдық орталығының басшысы Салтанат Жабағиева.