Астана. 14 тамыз. BM.KZ — Италияда әлемдегі ең ірі жүк ұшағы саналатын WindRunner жобасы жүзеге асырылмақ. Бұл ерекше әуе кемесі заманауи электр станцияларына арналған алып жел турбиналары сияқты үлкен көлемдегі жүктерді тасымалдауға бейімделеді. Сарапшылардың айтуынша, жоба авиация мен жаңартылатын энергия саласында жаңа кезеңнің басталуына жол ашады, деп жазады initalia.virgilio.it.
Жобаны АҚШ-тағы Radia стартапы әзірлеп жатыр. 2016 жылы MIT профессоры Марк Лундстром негізін қалаған бұл компания Дүниежүзілік экономикалық форумда «өсу әлеуеті жоғары» кәсіпорын ретінде танылған. Олар жаһандық мәселелерді шешуде жаңашыл тәсіл қолданудың арқасында осындай мәртебеге ие болып отыр.
Ұшақтың өзіне келсек, WindRunner ұзындығы – 108 м, қанат құлашы – 80 м, ұшу қашықтығы – 2000 шақырым. Фюзеляжын жасауға Leonardo, ал шассиін Magnaghi Aerospace компаниялары қатысады. Сондай-ақ, Испания, Нидерланды және Ұлыбританияның өндірістік серіктестерімен де жұмыс істеу жоспарланған.
Құрастыру орталығы Пулия аймағындағы Grottaglie зауытында орналасады. Бұған қоса, Кампания және Калабрия өңірлері де оқу-ағарту бағдарламаларына қатыспақ. Жоба аясында шамамен 2500 жұмыс орны ашылып, бірнеше млрд еуро инвестиция тарту көзделген.
Radia компаниясының Еуропа және Италиядағы президенті Джузеппе Джордо өндіріс 2025 жылдың соңына қарай басталатынын, ал алғашқы ұшақтар 2030 жылы жеткізілетінін мәлімдеді. Жоспар бойынша жылына 5 әуе кемесі шығарылып, жалпы саны 120 данаға жетеді. Олар ірі жел турбиналарын тасымалдау үшін қолданылады.
Джордо Италияның бұл жобадағы рөлі стратегиялық тұрғыдан маңызды екенін атап өтті. Оның айтуынша, бюрократиялық кедергілерге қарамастан, ел осы ауқымды бастаманың басты серіктесі болып қала береді және энергия секторындағы технологиялық серпіліске үлес қосады.