Астана. 14 тамыз. BM.KZ — Қазақстан Ұлттық банкі Конституцияның 30 жылдығына орай арнайы коллекциялық монеталарды айналымға шығарды. ҚҰБ мәліметінше, монеталар «Есте қалатын оқиғалар мен біртуар адамдар» сериясының аясында дайындалған.
Ата Заң – Қазақстанның тәуелсіздігінің іргетасы, құқықтық мемлекет пен демократиялық институттардың қалыптасуын айшықтайтын тарихи құжат. Осыған орай шығарылған мерекелік монеталардың бет жағында ашық кітап түрінде бейнеленген Конституция және Қазақстан картасының контуры аясындағы «30» саны бейнеленген. Картаның ортасына күнді бейнелейтін шаңырақ орналастырылған. Ал монеталардағы «30» саны алтын жалату технологиясымен жасалған.
Ұлттық Банк екі түрлі нұсқадағы монеталарды таныстырды. Біріншісі – 925 сынамды күмістен жасалған, массасы 31,1 грамм, диаметрі 38,61 миллиметр, номиналы 1 000 теңге болатын «proof» сапасындағы монета. Оның мың данасы таратылған.
Екіншісі – нибрасс және нейзильбер қоспасынан жасалған биколорлы монета. Салмағы – 6,45 грамм, диаметрі – 24,5 миллиметр, номиналы 100 теңге. Бұл нұсқаның таралымы – 5 млн дана.
Күміс монеталар ҚҰБ интернет-дүкені арқылы сатылымға шығарылады, нақты күні қосымша хабарланады. Ал 100 теңгелік биколорлы монеталар қолданыстағы ақша айналымымен қатар еркін айналыста болады.
Ұлттық Банктің хабарлауынша, коллекциялық монеталар Қазақстанның бүкіл аумағында төлем құралы ретінде жарамды, оларды банктерге өткізуге, шоттарға есепке алуға және айырбастауға болады.
Барлық мерекелік монеталар Қазақстан теңге сарайында дайындалған.