Астана. 15 тамыз. BM.KZ — Жаппай егін жинау науқаны тамыздың үшінші онкүндігіне жоспарланған. Бүгінде жаңа өнім жинау жұмыстары 12 облыста және Шымкент қаласында жүріп жатыр. Бұл туралы премьер-министрдің орынбасары – ұлттық экономика министрі Серік Жұманғариннің төрағалығымен өткен жедел штаб отырысында мәлім болды.
Жалпы егіс алқабы 23,6 млн гектарды құрайды, оның ішінде 16 млн гектарға дәнді және дәнді-бұршақты дақылдар егілген. Қазір 1,1 млн гектар жер орылып, 1,6 млн тонна астық бастырылды. Сондай-ақ 363,5 мың тонна картоп, 1,3 млн тонна көкөніс және 1,6 млн тонна бақша өнімдері жиналды.
Жаппай науқанға 139 мың трактор, 31 мың комбайн, 17 мың шапқыш және 130 мыңнан астам басқа да техника тартылды. Дайындық деңгейі 93%-ды құрап отыр, ал жақын күндері толықтай 100%-ға жеткізіледі.
Шаруаларды қолдау мақсатында 402 мың тонна арзандатылған дизель отыны бөлінген. Оның бағасы нарықтағыдан 18-20%-ға төмен. Сонымен қатар, көктемгі дала және жиын-терім жұмыстарына 490 млрд теңгеден астам жеңілдетілген несие берілген.
Элеваторларда жаңа өнімді қабылдау үшін орын босатылу үстінде. Қазір астық сақтау қоймаларының жүктемесі небәрі 16%-ды құрайды. Қазақстандық астықты шетелге экспорттау бағытында да келіссөздер жүріп жатыр.