Астана. 15 тамыз. BM.KZ — Мемлекет басшысы Қасым-Жомарт Тоқаев ұстаздардың жыл сайынғы тамыз кеңесіне қатысып, білім беру саласын дамытуға қатысты бірқатар маңызды міндеттерді атады.
Президенттің айтуынша, соңғы 4 жылда еліміздегі 4 мыңнан астам мектептің материалдық-техникалық базасы жаңартылған, оның басым бөлігі – ауылдық білім ошақтары. Ауыл мектептеріне күрделі жөндеу жүргізіліп, жаңа кітапханалар, асханалар мен спорт залдары салынып жатыр.
Биылдан бастап барлық мектепте, соның ішінде жекеменшік білім ошақтарында да «Адал азамат» біртұтас тәрбие бағдарламасы іске қосылады. Тоқаев бұл жобаны педагогикалық жоғары оқу орындарына да енгізуді ұсынды.
«Отбасы – мектеп – мемлекет» үштігі үйлесімді болса, жақсы нәтижеге жетуге болады. Ал бұл үштіктің өзегінде – еңбекқорлық идеясы болуға тиіс. Жас ұрпаққа еңбексіз ешқандай игілік болмайтынын үнемі түсіндіріп айту керек. Қоғамда масылдыққа жол бермеу қажет. Себебі, бұл жол тек тығырыққа тірейді, – дейді мемлекет басшысы.
Мемлекет басшысы балаларды әлеуметтік кеселдерден қорғаудың маңыздылығына тоқталды. Қазір жасөспірімдердің көп уақыты интернетте өтетіндіктен, жалған идеялар мен теріс ықпалға түсіп кету қаупі жоғары. Сондықтан педагогтер балаларды эмоциясын бақылауға, байыппен ойлауға, дұрыс шешім қабылдауға үйретуі керек.
Сонымен қатар, цифрландыру мен жасанды интеллект білім сапасын арттыруға және теңсіздікті еңсеруге мүмкіндік беретіні атап өтілді. Бүгінде мектептердің 95%-ы жылдам интернетке қосылған, алдағы уақытта бұл көрсеткішті 100%-ға жеткізу жоспарланып отыр.
Президент ұстаз мәртебесіне де ерекше тоқталды. Оның айтуынша, «Педагог мәртебесі туралы» заңға мұғалімдердің құқықтарын қорғауға қатысты өзгерістер енгізу қажет. «Мемлекеттің міндеті – мұғалімнің қоғамдағы беделін барынша арттыру», – деді Қасым-Жомарт Тоқаев.