Астана. 16 тамыз. BM.KZ – Fox News телеарнасына берген сұхбатында Ақ үй басшысы Украина мен Ресей президенттері бетпе-бет кездесу өткізуді жоспарлап отырғанын және Владимир Зеленскийге «келісімге қол қоюды» ұсынатынын айтты, деп хабарлайды Deutsche Welle.
АҚШ президенті Дональд Трамптың айтуынша, Зеленский мен Путин жеке кездесіп, «бітімге келуге тырысуды» және Ресейдің Украинаға қарсы соғысына түпкілікті нүкте қоюды көздеп отыр. Бұл туралы ол 16 тамызға қараған түні Fox News арнасының эфирінде, Путинмен Аляскада өткен келіссөздерінің нәтижесі бойынша мәлімдеді.
«Енді бәрі президент Зеленскийге байланысты. Сондай-ақ мен еуропалық елдер де аздап араласуы керек деп айтар едім. Бірақ бәрі Зеленскийге байланысты… Егер олар қаласа, мен де келесі кездесуде боламын, – деді Трамп. – Менің ойымша, енді президент Зеленский, президент Путин және менің қатысуыммен кездесу ұйымдастырылады».
Ақ үй басшысы Зеленскийге «келісімге келуді» ұсынатынын, себебі «Украинада адамдардың қаза табуын тоқтату керектігін» айтты. Путинмен өткен келіссөздерде «НАТО, қауіпсіздік шаралары және жер алмасу» мәселелері қозғалғанын жеткізгенімен, нақты егжей-тегжейін ашпады.
Бұған дейін бірнеше сағат бұрын АҚШ пен Ресей президенттері Украинадағы соғысты тоқтату бойынша «үшке үш» форматындағы келіссөздерді аяқтағаннан кейін Аляскадағы АҚШ әуе күштерінің Элмендорф-Ричардсон әскери базасында қысқа бірлескен баспасөз конференциясын өткізді. Бұл – Ресейдің Украинаға жаппай басып кіргелі бергі АҚШ пен Ресей басшыларының алғашқы кездесуі болды.
Путин келіссөздерді нәтижелі әрі АҚШ-ты «жақсы көрші» деп атады. Ол тағы да «украин дағдарысының бастапқы себептері бар» екенін және оларды «қақтығысты тоқтату үшін жою қажет» екенін айтты.
Өз кезегінде Трамп тараптар «толық түсіністікке жете алмағанын және әзірге келісімнің жоқтығын» мәлімдеді. Дегенмен, Ақ үй басшысы кездесуді «өте нәтижелі» деп атап, Вашингтон мен Мәскеудің Украинадағы соғыс бойынша көптеген тармақтарда ортақ мәмілеге келгенін жеткізді. АҚШ президентінің айтуынша, қазір елдердің «бейбіт реттеуге қол жеткізуге жақсы мүмкіндігі бар». Трамп жуырда Украина президенті Владимир Зеленскийге және НАТО серіктестеріне келіссөздердің қорытындысы туралы телефон арқылы хабар беретінін айтты.