Астана. 18 тамыз. BM.KZ — Премьер-министр Олжас Бектенов мемлекет басшысының жасанды интеллектіні дамыту мәселелері жөніндегі кеңесте берген тапсырмаларын жүзеге асыру бойынша цифрлық штаб отырысын өткізді.
Цифрлық штабтың шешімімен мемлекеттік органдардың ақпараттық жүйелерін интеграциялаудың кешенді жоспары, жасанды интеллект деректер массивтерімен жұмыс істеу регламенті және оны жүзеге асыру жоспары бекітілді.
Сондай-ақ, Smart Data Ukimet бойынша мемлекеттік деректерді біріктіру бойынша жұмыстарды аяқтау мерзімдері анықталды. Жаңа хэштеу әдісін қолданатын интеграция биылғы 1 қыркүйегінде аяқталуы керек, ал барлық дерек осы жылдың 1 желтоқсанына дейін платформаға берілуге тиіс.
Сонымен қатар, жоспарда осы жылдың 15 қыркүйегіне дейін мемлекеттік органдар қызметкерлерінің AITU ұлттық мессенджеріне көшуі қарастырылған.
«Мемлекеттік органдардың ақпараттық жүйелерін интеграциялаудың кешенді жоспары негізінде 224 ақпараттық құрамдас алаң құрылады. Бұл интеграция үшін еңбек шығындарын азайтуға, функционалдық және статистикалық айырмашылықтар тұрғысынан ақпараттық жүйелердің қайталану мәселесін шешуге мүмкіндік береді. Бүгінгі таңда «электрондық үкімет» аясында мемлекеттік органдар мен квазимемлекеттік сектор ұйымдарының 355-тен астам ақпараттық жүйесі мен веб-ресурсы жұмыс істейді», – деп жазылған Үкімет хабарламасында.