Шымкент. 19 тамыз. /Әсел Мәдәліқызы/ BM.KZ – Руслан Берденовке оқ атқан Ернар Жиембайға қатысты үкім алдындағы соңғы сөздері тыңдалды.
Ол өз сөзінде өкінетінін айтып, Руслан Берденовтан кешірім сұрады.
«Бұл оқиға артқа оралса, мұндай жайтқа бармас едім. Өкінемін. Ақ қалаттылардың көмегімен Руслан Арысбекұлы биологиялық өлім таппады. Сондықтан қатаң жаза қолданбауыңызды сұраймын. Қолыммен жасағанымды мойныммен көтеремін. Руслан Арысбекұлының ресурсы көп болғанымен, менде Алла мен сенімім сізге, құрметті сот. Жеңіл жаза беруіңізді сұраймын», – дейді айыппалушы Ернар Жиембай.
Сондай-ақ, алдыңғы отырыстарда айтқан бастапқы ұстанымынан таймайтынын жеткізді.
«Мен өзімді есі дұрыс адам ретінде айта аламын, сараптама қорытындысы бар. Өзіммен-өзім тиіспеген адамға қаруымды алып оқ атқан жоқпын. Сот тергеуінде берген жауабымды толық қуаттаймын. Кеше ота жасалуы керек болғасын көп сұрақ қоюға мүмкіндік болмады. Өкінемін, себебі менің оның денсаулығына зиян келтіргенім рас. Операцияға кетейін деп тұрған соң, ауыр сұрақтар қоймай кешірім сұраумен болдым. Бірақ Руслан Берденов маған «еркек болсаң, әйеліңді тықпайтын» едің деп айтты. «Мен ақша сұрамаймын» деп мәрттік көрсетті, бірақ кеше 25 млн сұрайтынын айтты. Бірақ менің моральдық шығынымды кім өтейді? Балаларымды кім бағады? Бұл істің саясилануын қаламаймын. Руслан Арысбекұлының қаржысы көп, билікте танысы көп. Сол себепті мені ең ауыр жазаға тартуға барын салып жатыр», – деді ол.
Сонымен бірге, бүгін де өзіне тағылған айыпты ҚК-нің 106-бабымен саралап, ең төменгі жаза мөлшерін белгілеп, бас бостандығынан айырмайтын жазаға тартуын сұрады.
Айта кетейік, кеше Қылмыстық істер жөніндегі мамандандырылған ауданаралық соты жарыссөз өткен еді. Ал оқиға 21 сәуір күні қалалық әкімдік алдында орын алды. Онда күдікті қала әкімінің орынбасарына бірнеше рет оқ атқан. Салдарынан Берденовке 5 сағат ота жасалғанмен денесінде 60-тан аса пытыра қалып қойған. Осыған байланысты Жиембайдың үстінен адам өлтіруге оқталу бабымен сот процесі жүріп жатыр.
Сот үкімі ертең жарияланбақ.