Астана. 20 тамыз. BM.KZ — Абай облысының Үржар ауданында кәмелетке толмаған балаларға қатысты қайғылы жағдай тіркелді. Жол-көлік оқиғасы салдарынан 2-7 жас аралығындағы үш бала көз жұмды. Сондай-ақ, 6-9 жас аралығындағы тағы 3 бала жарақат алып, қазір дәрігерлердің бақылауында қажетті медициналық көмек алып жатыр.
Белгілі болғаны, зардап шеккендер екі отбасының балалары. Қайтыс болған үш баланың екеуі Жарма ауданының Жаңғызтөбе ауылынан ата-әжелеріне қонаққа келген, біреуі Үржар ауданының тұрғыны. Жарақат алған үш баланың екеуі Үржар ауданынан, біреуі Жарма ауданынан.
Облыс әкімдігі тарапынан қаза болған балалардың отбасыларына жерлеу рәсімін ұйымдастыру үшін барлық қажетті қолдау көрсетіледі. Сонымен қатар психологиялық және материалдық көмек те беріледі.
Оқиға орнында облыс әкімінің орынбасарының үйлестіруімен арнайы жұмыс тобы құрылған.
Осы оқиғадан соң мемлекет басшысының тапсырмасы бойынша медициналық көмек көрсету үшін Қорғаныс министрлігінің С-295 әскери-көлік авиациясының ұшағымен құрамында реаниматолог, нейрохирург және травматолог бар медициналық бригада облысқа ұшып барды.
Денсаулық сақтау министрлігінің мәліметінше, облыстық және республикалық деңгейдегі үздік дәрігерлерден құралған мультидисциплиналық бригада толық диагностикалық тексеру жүргізіп, балалардың жағдайын бағалап, жедел емдеу жоспарын жасады.
Қазір стационарда үш бала ем қабылдау үстінде. Оның біреуінің жағдайы өте ауыр, қалған екеуінің жағдайы тұрақты ауыр деп бағаланған. Балаларда бас сүйек-ми жарақаттары, тірек-қимыл аппараты мен ішкі ағзалардың зақымдануы анықталған.
Пациенттердің жағдайы тұрақталғаннан кейін оларды Астанаға әуе бортымен тасымалдау мәселесі қарастырылмақ. Дәрігерлердің мәліметінше, бір балаға қазір күрделі нейрохирургиялық операция жасалып жатыр. Ал екіншісінде ішкі ағзалардан қан кету тоқтатылған.
Денсаулық сақтау министрлігі жағдайды ерекше бақылауда ұстап отыр. Балаларға көмек толық көлемде көрсетілуде.