Шымкент. 20 тамыз. /Нұргүл Ерғалиқызы/ — Атышулы Берденов сотының ақыры айыпталушы Ернар Жиембайды 9 жылға соттаумен бітті. Бірақ олардың әлі апелляциялық шағым беру мүмкіндігі бар. Үкім оқылғаннан кейін Ернар Жиембай алғаш рет журналистерге өзін түсіруге рұқсат беріп, үкімге қатысты өз ұстанымын білдірді.
«Үкіммен келіспеймін. Өлтіру ниетім болмаған. Руслан Арысбекұлының «мені өлтірмекші болды» деп қорқыныштан айтып жатқан сандырағы деп ойлаймын. Өздеріңіз видеода көргендеріңіздей, өлтіретін болсам, ол кісіні қаштырмас едім», – дейді ол.
Тілшілер одан «қанша жыл күттіңіз?» деп сұрады.
«Осы 9 жыл болса, 9 жыл. Бірақ әділі адам өлтіру ниетінсіз, 106, «денсаулыққа қасақана ауыр зиян келтіру» бабымен… Себебі, нақты аяқталған қылмыс сол, денсаулығына ауыр зиян келген, болды. Биологиялық өлім келмеген», – деп жауап қатты.
Сондай-ақ, журналистер сот отырысы барысында неге келіншегі туралы айтпағанын білді.
«Айттым ғой, енді оны адами қасиет деп айтуға болады. Ол кісі операцияға кірейін деп жатты. Оны қазір ұрысып, қан қысымын көтеріп керегі жоқ деп ойлаймын», – деді.
Ал бұлай қорқытуға барған себебі, өзінің айтуынша, біріншіден, шақырып алып, себепсізден себепсіз дөрекілік көрсеткен. «Тупойсың», «шашың түсіп қалған» деген.
«Кәдімгідей тұрып, жағамнан ұстады, көмекшілері айтпайды оны. Өздеріңіз көрдіңіздер, көмекшісі де, құрылыс басқармасының басшысы да айтты. Руслан Берденов құрылыс басқармасының басшысына: «Жиембайды соттатам, себебі, көмекшіме мінез көрсетті» деп айтқан. Соған мән бермедіңіздер», – дейді Ернар Жиембай.
Сонымен қатар, әкесі Жиенбай Пірәлиев те үкімнен кейін тілшілер алдына шығып, жағдайды толық баяндап, келініне қатысты әңгіменің болғанын, бірақ сотта ашып айтылмай кеткенін растады. Оның айтуынша, Берденов өзінің шекарасынан өтіп кеткен.
«Менің келінім өсіп-өнген жердің қызы. Соған лайк басып, тағы да басқа әрекеттер бар, енді оның бәрін балам отбасын сақтап қалу үшін ішіне жұтып кетті. Сіздер оны «жала жапты» деп ойламаңыздар. Ол болған нәрсе», – дейді Жиенбай Пірәлиев.
Сондай-ақ, Берденовті ату себебі де бекер болмағанын, жеке шекарасынан өтіп кеткендіктен болғанын тағы нақтылады.
«Не үшін атты? Менің балам жынды емес. Бекерден-бекер барып атпайды ғой. Ол өтіп кеткен шекарасынан менің баламның. Бес оқ атты деп. Намысына тиген. Шешенстанда болса, әйеліңе лайк басса, басқа бір нәрсе істейтін болса, сотсыз-ақ атып өлтіретін еді. Біз алдына барып, кешірім сұрап жүрдік. Біз неге ресми мәлімдеме жасадық? Келін неге ресми мәлімдеме жасады? «Сіздер БАҚ-қа шықпайсыздар…» Біз «шықпаймыз» дедік. Бірақ, кешірім жоқ. Сот барысында болған нәрселердің 50 пайызы ғана ақпарат жүйесінде жарияланды. Қалғандары айтылмады. Тергеуге бізді қатыстырмады. Тергеу біржақты өтті. Берденовтің костюмдері экспертизаға берілмеген. 45 күннен кейін алып келіп берді. Оны да мен жаздым», – деді әкесі.
Соған қоса, Ернар Жиембайдың жұмыс барысында 3,5 млрд теңге қаражатқа қатысты қауесетіне түсініктеме бере кетті.
«Ол ЖШС сол жердегі тұрғын үйлердің сыртын, шатырын істейтін мекеме. Оның ақшасының бәрін төлейтін тұрғын үйдің адамдары, несиемен мойындарына жазылады. Ол жұмыстың барысында тұрғындардың өздері шығып, қарап, қай жерін істету керек, қай жерін істетпеу керек – сметасын өздері бірге құрады. Себебі, ертең төлейтін солар. Сол ақпаратты алып, барлығы Берденовтің жағына қарай бұрып, «3,5 млрд ақша жымқырылыпты» дейді. Соның ақ-қарасына жетпей, небір қаралау деректері болды. Бірақ мен соған қарамастан, барлық БАҚ-қа рахмет айтам. Барлық жайды дұрыс бейнелеп, дұрыс жазып жатқандарыңызға үлкен рахмет!», – деді ол.
Айта кетейік, Шымкент қаласы әкімінің орынбасары Руслан Берденовті атқан Ернар Жиембайға қатысты сот процесі екі айға жуық созылып, соңында айыпталушыны 9 жылға соттаумен біткен еді.