Шымкент. 20 тамыз. BM.KZ — Шымкентте тергеу изоляторында отырған ХҚКО-ның бұрынғы басшысы Жомарт Мұрашимовтың инсульттан көз жұмғаны белгілі болды.
Қалалық денсаулық сақтау басқармасының мәліметінше, айыпталушының бірнеше дерті болған. Салдарынан қамауда жатып қан қысымы көтеріліп кеткен көрінеді.
«2025 жылғы 18 тамызда сотталушының жағдайы күрт нашарлап, артериялық қысымы 240/120 мм сын. бағ. дейін көтерілді, жедел ми қан айналымының бұзылу белгілері тіркелді. Жедел медициналық жәрдем бригадасымен ол №1 қалалық клиникалық аурухананың қабылдау бөліміне жеткізіліп, нейрореанимация бөліміне «Жедел ми қан айналымының бұзылуы (геморрагиялық түрі)» диагнозымен жатқызылды», — деп жазды Шымкент қалалық денсаулық сақтау басқармасының баспасөз қызметі.
Ақ халаттылар берген мәліметке сәйкес, ол мекемеде болған кезеңінде профилактикалық тексерулерден өтіп, бейінді мамандардың кеңестерін алған. Дәрігерлер оған артериялық гипертония, бронхиалды астма және остеохондроз диагноздарын қойыпты. Марқұм тергеу изоляторында есінен танып, жедел ауруханаға жеткізілгенмен, жансақтау бөлімінен шықпастан бақилық болды.
«Көрсетілген толық көлемдегі медициналық көмекке қарамастан, 2025 жылғы 19 тамызда сағат 10:46-да тергеудегі азамат М.-ның биологиялық өлімі тіркелді. Өлім себебі: жедел жүрек-қантамыр жеткіліксіздігі, көп ағзалық жеткіліксіздік», — дейді Шымкент қалалық денсаулық сақтау басқармасының баспасөз қызметі.
Алдын ала тыңдау кезінде айыпталушы денсаулық жағдайын айтқанымен, судья Мұрашимовтың денсаулығына байланысты арнайы мекемеден бұлтартпау шарасы қажеттілігі туралы ұсыныстар түспегенін айтқан. Осылайша қамауға қайта жіберілген.
Жомарт Мұрашимов 1988 жылы туған дүниеге келген. Марқұм №2 мамандандырылған халыққа қызмет көрсету орталығының басшысы болып жұмыс істеген. Кеше туыстары мен жақындары оның жаназасын шығарды.
Оның үстінен ҚР ҚК-нің «Заңсыз сыйақы алу», «Қылмыстық жолмен алынған ақшаны және өзге мүлікті заңдастыру», «Ұйымдасқан топ, қылмыстық ұйым құру және оларға басшылық ету, сол сияқты оларға қатысу» бабымен іс қозғалған. Алайда ол өз кінәсін мойындамаған. Айта кетейік, осы айыппен ХҚКО 15 қызметкері үстінен сот басталған еді.