Астана. 21 тамыз. BM.KZ – Израиль армиясы Газа қаласының шеткі аумақтарын бақылауға алды. Бұл туралы Израиль Қорғаныс армиясының (ЦАХАЛ) өкілі, бригадалық генерал Эффи Дефрин мәлімдеді. Оның айтуынша, алдағы күндері ХАМАС-қа қарсы шабуылдар бұрынғыдан да қарқынды болмақ, деп хабарлайды Deutsche Welle.
Дефриннің сөзінше, ХАМАС қазір тек «әлсіреген партизандық топқа» айналған. Израиль тарапы бейбіт тұрғындардың қақтығыс аймағынан эвакуациялануына, сондай-ақ гуманитарлық және медициналық көмек алуына жағдай жасауға күш салып жатқанын жеткізді.
Сонымен қатар, Израильде резервке шақыру жүріп жатыр. Апта соңына дейін 60 мыңға жуық, айдың соңына дейін тағы 20 мың резервистке шақырту қағазы жолданбақ. Алайда Газаға шабуылға әзірге негізінен қолданыстағы әскери бөлімдер қатысады.
21 тамызда Израиль премьер-министрі Биньямин Нетаньяху мен қорғаныс министрі Исраэль Кац Газа қаласын толықтай бақылауға алу жоспарын бекітеді деген болжам бар.
Бұған қоса, Израиль мен ХАМАС арасындағы атысты тоқтату жөніндегі келіссөздер Египет пен Катардың арағайындығымен жалғасып жатыр. 18 тамызда БАҚ-тағы ақпаратқа сәйкес, ХАМАС АҚШ президентінің арнайы өкілі Стив Уиткофф ұсынған жоспарды қабылдаған. Ол 60 күндік уақытша бітімді және 10 израильдік тұтқынды босатуды қарастырады. Израиль үкіметі әзірге бұл ұсынысқа ресми жауап берген жоқ.
Айта кетейік, 9 тамызда Германия, Италия, Ұлыбритания, Австралия және Жаңа Зеландия Израильдің Газаға жаңа шабуылын айыптап, мұндай операция гуманитарлық апатты күшейтетінін, бейбіт тұрғындардың өміріне қауіп төндіретінін және жаппай көшуге әкелуі мүмкін екенін мәлімдеген болатын.
Бірлескен мәлімдемеде бұл елдер халықаралық қауымдастықты қантөгісті дереу тоқтатуға шақырды. Сонымен қатар, ХАМАС қолындағы тұтқындарды ешқандай шартсыз босатуды талап етті.
Еске салайық, Таяу Шығыстағы ахуал 2023 жылғы 7 қазанда ХАМАС-тың Израильге жасаған ауқымды шабуылынан кейін күрт шиеленіскен еді. Шабуыл салдарынан шамамен 1200 адам қаза тапты, 250-ден астам бейбіт тұрғын тұтқынға алынып, Газадағы анклавқа әкетілді. Олардың бір бөлігі босатылды немесе айырбасталды, біразы қаза тапты.
Израильдің қарымта соққылары кезінде Газа секторында 60 мыңнан астам палестин қаза тауып, 145 мыңнан астам адам жараланғанын ХАМАС-қа бағынышты денсаулық сақтау министрлігі хабарлады. Дегенмен, мұндай деректердің ішінде қаза тапқан жауынгерлердің саны және өзге жағдайлар есепке алынған-алынбағаны нақты көрсетілмеген.