Астана. 21 тамыз. BM.KZ – Қазақстандағы электр қуаты нарығын талдау нәтижелері күтілген мақсаттардың орындалмағанын көрсетті.
Бәсекелестікті қорғау және дамыту агенттігінің мәліметіне сенсек, 2019 жылдан бері елдегі орнатылған қуат бар болғаны 129 МВт-қа ғана артқан. Ал 6 жыл ішінде нарық қатысушыларының жиынтық табысы 500 млрд. теңгеден асқан.
Алайда бұл қаражаттың тек 7%-ы ғана генерациялау қуаттарын жаңғыртуға және реконструкциялауға бағытталған. Қалған 93%-ы жабдықтардың жұмыс жағдайын бір қалыпта ұстауға жұмсалған. Соның салдарынан электр станцияларының тозу деңгейі 2019 жылдан бері өзгеріссіз қалып отыр. Бұл – шамамен 56%-ды құрайды.
Сарапшылардың есебінше, аталған қаражатқа қуаты 530 МВт бір көмір станциясын немесе жалпы қуаты 1150 МВт болатын бес бу-газ станциясын салуға болар еді.
Нарықтағы жағдайға сүйенсек, электр қуатының дайындығын қолдау қызметінде «Самұрық-Энерго» АҚ Солтүстік және Оңтүстік аймақтарда 35%-дан астам үлеспен, ал Батыста үш ірі компания 70%-дан астам үлеспен доминантты жағдайда тұр. Ал жел энергиясын тасымалдаушы ретінде «ЖЭК бойынша РФО» ЖШС толық монополияға айналған.
Агенттіктің мәліметінше, мемлекеттік бақылаудың жеткіліксіздігі салдарынан аталған салада түскен қаражаттың едәуір бөлігі жаңа қуат көздерін салуға емес, дебиторлық берешекті жабуға жұмсалған.