Астана. 21 тамыз. BM.KZ – Қазақ бейнелеу өнерінің көрнекті өкілі, Қазақстанның еңбек сіңірген қайраткері, Мемлекеттік сыйлықтың лауреаты, профессор Ағымсалы Дүзелханов мезгілсіз қайтыс болды.
Ағымсалы Дүзелханұлы – бейнелеу өнерінде өзіндік қолтаңбасымен дараланған бірегей суретші. Ол 1951 жылы 19 тамызда Қызылорда облысының Қазалы қаласында дүниеге келген. 1976 жылы Алматы көркемсурет училищесін, 1982 жылы В.И.Суриков атындағы Мәскеу көркемсурет институтын тәмамдаған. Суретші «Томирис», «Сақтар», «Айман – Шолпан», «Қыз Жібек» сынды литографиялары мен «Алтын сарбаз», «Түркістан», «Ордабасы», «Көроғлы», «Оғыз хан» сияқты кескіндемесін артында өшпес мұра етіп қалдырды.
Сонымен қатар, суретшінің «Абылай хан», «Әбілқайыр хан», «Әйтеке би», «Қазыбек би», «Төле би», «Қорқыт» бейнелерін қамтитын портреттер сериясы да бар.
Айта кетейік, Ағымсалы Дүзелханов төл валютамыздың дизайн авторларының бірі. 1992 жылдың 27 тамызында Ұлттық банк теңге купюрасының үлгілерін бекітті. Ертеңіне қазақ валютасын дүниеге әкелген суретшілер – Тимур Сүлейменов, Меңдібай Алин, Ағымсалы Дүзелханов, Қайролла Әбжәлеловтер ақша басып шығарып әкелу үшін Англияға аттанды.