Елордалық тігінші әлемге әйгілі әншінің сахналық киімдерін қалай дайындағанын айтып берді.
Белгілі әнші Дженнифер Лопестің Астанадағы концерті кезінде костюмерлер командасы 15 сағат бойы жұмыс істеген. Осы аралықта елордалық тігіншілер әнші мен оның бишілерінің 50-ден астам сахналық костюмін реставрациялаған. Концерт кезінде америкалық әншінің костюмерлер командасына елордалық тігіншілер қызмет көрсеткен. Оның арасында модельер-конструктор Абдулманап Мұратов та болды.
«Желімдеуге рұқсат бермеді, қолмен тігіп шықтық»
Абдулманап жұмыс істейтін компанияға Джей Лоның концертінде костюмерлер командасына қосылып, жұмыс істеу туралы ұсыныс түскенде тамсанып қалғанын айтады. Бұл уақытта концертке бір ай қалған еді. Ал бір апта қалғанда командада жұмыс істейтін он адамды іріктеп алған. Кейіпкеріміз солардың бірі болған.
«Бір күн қалғанда «Астана аренаға» өзіміздің жұмыс құрал-жабдықтарымызды апарып орнаттық. Ұйымдастырушылар алдын ала қажет құралдардың прайсын жіберген, одан бөлек өзіміз керек болып қалады-ау деген заттарды ала бардық. Заттарымызды үш көлікпен жеткіздік. Стадионда тек әнші мен оның командасы және біз ғана кіріп жүрген арнайы бөлмелер болды. Өйткені, бізге 3 түрлі рұқсат берілді: бейдж, жапсыратын бейдж бен білезік. Осы үшеуімен залға да, сахнаның артына да – кез келген жерге баруға рұқсат етіледі. Ондай рұқсат тіпті, концерт ұйымдастырушыларында да болған жоқ», – дейді Абдулманап.
Модельер жігіт әлемдік жұлдыздың сахналық образдары концертке қалай дайындалғаны жайында да айтып берді. Оның сөзінше, қазақстандық костюмерлер командасы концерт күні сағат таңғы 08:00-де стадионға жиналған. Бас костюмер келіп не істеу керек екенін түсіндірген. Әр костюмде киетін адамның аты-жөні жазылған. Алдымен соны ретімен ілу, жұбымен жинап қою, су болғанын кептіру жүктелген. Одан соң реставрациялайтын костюмдерді бөлек жинау тапсырылған.
«Бас костюмер нақты қай костюмдердің реставрацияланатынын өзі бөліп берді. Мен ағылшынша білмеймін, бірақ командада тілді жетік меңгергендер болды. Сондықтан не істеу керек екенін түсіндік. Костюм дайындауға тігін машинасын қолдануға болмайды, тек қолмен тігу қажет екені айтылды. Өйткені, костюмдердің бәрі қолмен тігілген. Ең қиыны сол. Өйткені әр страза, пайеткені бір-бірлеп қолмен тігуге тура келді. Мысалы, қызыл костюміндегі стразалардың пішіндері әр түрлі. Соның әрқайсын дәл келтіріп, тігіп шықтық. Желімдеуге рұқсат бермеді. Себебі, страза болған соң оны жууға болмайды. Тек спирт пен басқа да қоспасы бар арнайы сұйықтықты сеуіп тазартады. Желіммен жабыстырса, спирт тигенде иіс шығады екен. Сондай-ақ, қара пайеткасы бар костюмі болды. Бишілер бір-біріне жақындағанда кейбір пайеткелары ілініп, жұлынып қалған. Соларды да тігіп шықтық», – дейді ол.
«Костюмдеріне бізге дейін реставрация жасалмаған»
Бұған қоса, оның айтуынша, киімнен бөлек, әнші мен бишілерінің аяқ киімдерінің табанына тайдырмайтын арнайы мата жабыстырып шыққан.
«Бір рет реставрация жасалған киім бірден көрінеді. Бір қызығы, оның костюмдеріне бізге дейін реставрация жасалмаған екен. Қанша елде концерті болды, неге жасалмағанын сұрадық. Естіген жауабымыз таңғалдырды. «Қаншама елде болдық, жақсы тігінші болмайды, кейде тіл білмейді, сіздердің жақсы жасап жатқандарыңызды көрген соң, жасап алуды жөн көрдік» деді. Басында біткен соң концерт көреміз деген ой болған еді. Бірақ ән кеші жүріп жатқанда біз киім тігіп отырдық», – дейді Абдулманап.
Оның сөзінше, тек кезекпен 15-20 минутқа шығып көріп келіп отырған. Сол күні түскі ас ішуге небәрі 20 минут қана уақыттары болыпты. Бәрінің бар ойы киімдерді тігіп бітіру болған.
«Концерт кезінде бас костюмер жүгіріп келіп, «жүріңдер» деді. Барсақ Джей Лоның костюмі қысып тұр екен. Соны 2 минут ішінде сөгіп, кеңейтіп тігіп бердік. Әнші мен бишілерінің жүзден астам костюмі болды, соның 50-60 пайызын реставрациялап шықтық. Оның ішінде сахнада мүлдем кимеген костюмдер де болды. Оның сахналық киімдері негізінен боди костюм», – дейді Мұратов.
Айтуынша, бас костюмер сурет пен видеоға түсіруге тыйым салған. Түсіргеннің өзінде тек әншінің жоспарланған барлық концерті өткен соң ғана жариялауға болатынын ескерткен. Концерт аяқталған соң әншінің командасы келіп, қазақстандық тігіншілердің жұмысын жоғары бағалып, алғыс айтқан.
«Тігін туралы ой маза бермеді»
31 жастағы елордалық бұған дейін түрлі жеке кәсіппен айналысқан, соның бірі ателье болған. Алайда ателье ашып, ішінде киім тігіліп жатса да өзі киім пішуді не тігуді білмеген. Тек қажетті мамандарды жұмысқа алып отырған.
«Сол кезде «өзім тігін ісін үйренсем» деп армандайтын едім. Ательем шамамен бір жылдай жұмыс істеді. Сол кезде әнші Қарақат пен Қыдырәлінің гала концертіне киім тігуге тапсырыс түсті. Концертте бір әнші мен бір бала шығып ән айтты. Солардың киімін дайындап бердік. Коронавирус пандемиясы басталғанда ательені жабуға тура келді. Егер сол кезде өзім пішіп, тіге білгенде жабылмайтын еді. Кейін қоғамдық тамақтану ісімен айналысып көрдім. Бірақ қай кәсіппен айналыссам да тігін туралы ой маза бермеді», – дейді тігінші.
Сөйтіп жүргенде арада бірер жыл өткен соң «Joltap» жобасы туралы естиді. Еске салсақ, бұл – Астана әкімдігінің халықты еңбек нарығында сұранысқа ие мамандықтарға оқытып, табысын арттыруды көздейтін жоба. Кейіпкеріміз 2 жыл соған қатысып, алдымен модельер-конструктор, одан соң тігін ісі мамандығы бойынша курс оқып шығады.
«Оған дейін тігінші дайындайтын түрлі курсқа бардым. Алайда алғашқы сабақты көрген соң көңілімнен шыға бермейтін. Өйткені жаңа үйреніп бастағанда түрлі сұрақ туындайды. Оған толық жауап алмаған соң ұнатпаймын. Бұл жолы да тегін болған соң жүрдім-бардым өтетін шығар деген күдік болғаны жасырын емес. Бірақ оқу барысы өзім ойлағаннан жақсы болды. Әр детальді егжей-тегжей түсіндіріп, модельер-конструктор мен тігіншіге қажетті базаны қалыптастырып берді. Оқуды аяқтаған соң заманауи ұлттық киім-кешек тігетін отандық DALA BRAND компаниясына жұмысқа тұрдым. Сол жерде жұмыс істеп жатқаныма 2,5 жыл болды», – деп қосты ол.
Айта кетейік, Абдулманап Мұратов киім тігумен қатар сөмке тігуді армандайтынын жасырмады. Қазір ол сөмке тігу ісін бастауды жоспарлап отыр. Сондай-ақ, Миланға барып, білімін жетілдіріп, сән әлемінде із қалдырсам деген мақсаты бар.
Нұрай Халық,
BM.KZ