Астана. 26 тамыз. BM.KZ – 2025 жылдың бірінші жартыжылдығында Қазақстаннан шетелге 12,6 млн литр сыра экспортталды. Бұл өткен жылдың сәйкес кезең көлемінен үштен бір есе көп. Қаңтар-маусым аралығындағы көрсеткіш кем дегенде соңғы он жылдағы, яғни 2015 жылдан бергі ең жоғары деңгейге жетіп отыр. Бұл туралы Бірінші несие бюросы жазды.
Биылғы экспорт көлемін өткен жылғы дерлік барлық сатып алушы арттырған. Әсіресе Ресей, Беларусь және Қырғызстанға жеткізілімнің өсуі жалпы динамикаға әсер еткен. Негізгі бағыт – Ресей: бұл елге экспортталған өнім көлемі 7,5 млн литрге жетіп, жылдық өсімі 24%-ды құрады. Бұл көлем Қазақстанға өзге елдерден (Ресейден тыс) әкелінген барлық импорттан да артық болып отыр. Айта кетейік, Ресей Қазақстан үшін тек негізгі сатып алушы ғана емес, сонымен қатар басты жеткізуші ел болып табылады.
Дегенмен, Ресейге жөнелтілген өнімнің нақты қаншасы отандық өндіріс, қаншасы қайта экспорт екені анық айту қиын. Алайда құн көрсеткіштеріне сүйенсек, көрші елге негізінен Қазақстанда өндірілген сыра жеткізіліп жатыр деуге болады. Мәселен, Ресейге экспортталған бір литр өнімнің орташа бағасы шамамен $0,7 болды, бұл Қазақстан импорттаушыларының ТМД-дан тыс елдерден алған сырасымен салыстырғанда екі есе арзан.
Айта кету керек, ресейлік сатып алушылардың қазақстандық өнімге қызығушылығының артуы туралы шамамен бір жыл бұрын ресейлік БАҚ хабарлаған болатын. Ол кезде Алматы мен Қостанай зауыттарының Ресейде бұрын сертификатталмаған өнімдері бойынша құжат рәсімделгені айтылған.