Астана. 27 тамыз. BM.KZ — Мемлекет басшысының тапсырмасы бойынша Бас прокуратура Қаржылық мониторинг агенттігімен бірлесіп «Аграрлық несие корпорацисы» АҚ-ның қызметін тексерді.
Тексеру нәтижесінде мемлекетке материалдық залал келтірген «Шымкент қаласында екі алма бағын салу» жобасын іске асыру барысында Ауыл шаруашылығын қолдау қоры басшылығының лауазымдық өкілеттіктерін теріс пайдалану дерегі анықталған. Аталған дерек бойынша 10.07.2024 жылы Бас прокуратура Қылмыстық кодекстің 361-бабы 4-бөлігінің 3) тармағы (лауазымдық өкілеттіктерді теріс пайдалану) бойынша қылмыстық іс қозғаған. Тергеп-тексеру Шымкент қаласы бойынша Экономикалық тергеп-тексеру департаментіне жүктелген.
Іс материалдарына сәйкес АНК басқарма төрағасының бұрынғы орынбасары И.М. өнім беруші С.Р.-дың мүддесін көздей отырып, Шымкент қаласындағы техникалық ерекшеліктер мен мәлімделген өндірістік параметрлерге сәйкес келмейтін алма бақтарын пайдалануға қабылдаған (орындалмаған жұмыс құны – 430,6 млн теңге). Нәтижесінде бүгінде мемлекетке сараптамалар мен мамандардың қорытындысы бойынша 685,8 млн теңгеге материалдық залал келтірілген.
«Қылмыстық істің аясында қосымша ҚК-нің 190-бабы 4-бөлігінің 2) тармағы (алаяқтық) және ҚК-нің 189-бабы 4-бөлігінің 2) тармағы (бөтеннің мүлкін иемдену) бойынша бір өндіріске біріктірілген сотқа дейінгі тергеп-тексеру тіркелді. 07.08.2025 жылы Шымкент қаласының қылмыстық істер жөніндегі ауданаралық сотының үкімімен АНК басқарма төрағасының бұрынғы орынбасары И.М. және мердігер ұйымның директоры С.Р. мүлікті тәркілеумен 8 жылға бас бостандығынан айыру жазасына сотталды», – деп жазылған Бас прокуратура мәлімдемесінде.
Үкім әлі заңды күшіне енбеген.