Редакциямызға Шымкент қаласының тұрғыны, Роман Ли есімді азамат хабарласып, Шардара су қоймасының деңгейіне байланысты алаңдаушылық білдірген болатын. Оның айтуынша, су қоймасының айдыны шамамен 90%-ға дейін азайған.
«Түркістан облысының оңтүстігінде орналасқан Шардара су қоймасындағы күрделі жағдайға байланысты хабарласып отырмын. NASA спутниктік суреттерінің мәліметтері бойынша, су қоймасының айдыны шамамен 90%-ға дейін азайған. Бұл – су қоймасы тарихындағы ең ауқымды тартылу жағдайы болуы мүмкін. Аталған мәселе өңірдің экожүйесіне, халықты ауызсумен қамтамасыз етуге және Сырдария өзенінің ауыл шаруашылығындағы стратегиялық маңызын ескерсек, тұтас аймақтың экономикалық тұрақтылығына айтарлықтай қауіп төндіреді. Өкінішке қарай, бұл жағдайға байланысты қазіргі таңда билік немесе уәкілетті мемлекеттік органдар тарапынан ресми түсініктеме берілген жоқ», – деді Шымкент қаласының тұрғыны Роман Ли.
«Қазсушар» РМК Түркістан филиалы мамандарының айтуынша, 2024–2025 жылғы қыс мезгілінде қар мөлшері әдеттегіден төмен болған. Осыған байланысты, өзендерде табиғи ағын судың азаюы орын алып, су тапшылығы сезілген. Десе де, бұл мәселе реттелді дейді. Әзірге ешқандай қауіп жоқ.
«2025 жылғы 15 сәуірдегі дерекке сәйкес, су қоймаға 4 799 млн.м³ су жиналған. Бүгінде Шардара су қоймасында 238 млн.м³ су бар. Қазіргі таңда, вегетациялық суғару кезеңі аяқталуға жақын. Соған байланысты су шығымы қысқартылып, деңгейі тұрақтандырылды. Алдағы кезеңдерде жоғарыдан келетін суды жинау жұмыстары жүргізіледі. 2024–2025 жылғы қыс мезгілінде қар мөлшері әдеттегі деңгейден төмен болды. Бұл өзендерге түсетін табиғи ағын судың азаюына алып келді. Сонымен қатар, жауын-шашын да климаттық нормадан төмен түсті. Су шығымы қысқартылып, келіп түскен су қоймаға жиналуда. Қауіп жоқ», – деп мәлімдеді «Қазсушар» РМК Түркістан филиалының баспасөз қызметі.
Мамандардың айтуынша, қазіргі таңда төніп тұрған қауіп жоқ. Бұл – қысқы және көктемгі мезгілдерде келетін судың көлеміне байланысты дейді.
Айта кету керек, қала тұрғындарына су «Шардара сервис» МКК арқылы қоймадан алынып, арнайы тазарту жүйесінен өткізіліп беріледі. Сонымен қатар, Шардара су қоймасынан Шардара, Арыс, Отырар аудандары және Қызылорда облысының егістік алқаптары су алады.
Нұргүл Ерғалиқызы,
BM.KZ