Шымкент. 4 қыркүйек. /Нұргүл Ерғалиқызы/ — BM.KZТүркістан облысында үш күн бойы жоғалған туристердің бірі аман табылды. Ал, екіншісі өкінішке қарай, қаза тапты.
Шымкент қаласының тұрғындары 29 жастағы Акмаль Махкамов пен 28 жастағы Андрей Орлов Сайрам-Өгем ұлттық табиғи паркінің аумағындағы Сайрамсу шыңына шыққаннан кейін қайта оралмаған. Олардың туыстары құтқарушыларға хабарласып, 1 қыркүйек күні көмек сұраған. Тез арада іздеу жұмыстарына кіріскен мамандар Акмаль Махкамовтың мәйітін тапты. Ал Андрей Орлов аман-есен құтқарылды. Белгілі болғаны, ол бірнеше күн бойы тауда аштық пен шөлге төзіп, ұйқы көрмеген.
«Ол қайтып оралды. Өте қуаныштымыз. Құдайға шүкір. Қазір жағдайы жақсы. Әкем мен бауырым ауруханаға алып кетті. Біз ұйықтамай күттік. Осы күнге жеткенімізге шүкір дейміз. Біз үшін, уайымдаған жандарға шын жүректен алғысымды білдіремін», – деді Андрей Орловтың ағасы Кирилл Орлов.
Іздеу жұмыстары теңіз деңгейінен 2200 метр биіктікте, Қасқасу ауылынан шамамен 8 шақырым жерде орналасқан «Ізгі ниет» асуы маңында жүргізілді. Жартасты жер бедері мен қолайсыз ауа райы іздеу жұмыстарына айтарлықтай кедергі келтірген. ТЖМ баспасөз қызметінің мәліметінше, тікұшақ жартасты аумаққа жақындай алмағандықтан, құтқарушылар жаяу жүруге мәжбүр болған.
«Ізгі ниет» асуы ауданындағы операция барысында ТЖМ құтқарушылары туристердің бірімен дауыстық байланыс орнатты. Күрделі рельеф пен жартасты рельефтің арқасында тікұшақ оқиға орнына жақындай алмады және құтқару тобы жаяу жүруді жалғастырды. Құтқарушылардың бастамасы бойынша Шымкенттегі базадан Қазақстан альпинизм федерациясының бес кәсіби альпинисті жеткізілді, олар құтқарушылармен бірлесіп іздеу және эвакуациялау жұмысын жалғастырды. Альпинистер арнайы жабдықты пайдаланып, жартастарға көтеріліп, тірі қалған бір туристті, сондай-ақ қайтыс болған адамның денесін тапты. Жәбірленуші мен дене төмен қарай тасымалданды. Ал,марқұмның денесі полиция қызметкерлеріне берілді», – деп хабарлады Түркістан облыстық ТЖД баспасөз қызметі.
Марқұм Акмаль Махкамов 1996 жылы туған, Өзбекстан Республикасының азаматы.
Айта кетейік, құтқару операциясына Төтенше жағдайлар министрлігінің 18 қызметкері мен 5 арнайы техникасы, орман шаруашылығы, полиция бөлімшелері, альпинистер, ұшқышсыз ұшу аппараттары мен «Қазавиақұтқару» тікұшағы жұмылдырылды.