Астана. 9 қыркүйек. BM.KZ — Непалдың премьер-министрі сейсенбі күні әлеуметтік желілерге тыйым салуға және үкіметтегі сыбайлас жемқорлыққа қарсы өткен жаппай наразылықтардан кейін отставкаға кетті. Бұл туралы AP жазды.
Кхадга Прасад Оли дереу қызметінен кететінін мәлімдеді.
Оның отставкасы ел астанасы Катмандуда және басқа қалаларда жағдай ушығып, наразылық білдірушілер Непалдың кейбір жоғары лауазымды саяси қайраткерлерінің үйлерін өртегеннен кейін жарияланды. Әлеуметтік желілерге тыйым сейсенбі күні таңертең алынып тасталған еді. Бұл шешім үкіметке қарсы өткен қанды наразылықтардан кейін қабылданды: дүйсенбі күні полиция оқ атып, 19 адам қаза тапқан.
Жергілікті БАҚ пен әлеуметтік желілерде тараған видеоларда наразылыққа шыққандардың Катманду мен оның төңірегіндегі саяси көшбасшылардың үйлеріне шабуыл жасағаны көрсетілген. Астанада және басқа да қалаларда коменданттық сағат енгізіліп, Катмандудағы мектептер жабылды.
Өртке оранған үйлердің арасында ең ірі партия — Непали конгресінің жетекшісі Шер Бахадур Деубаның, Президент Рам Чандра Пауделдің, Ішкі істер министрі Рамеш Лекхактың және Непалдың коммунистік-маоистік партиясы жетекшісі Пушпа Камал Дахалдың үйлері бар. Сонымен қатар Деубаның әйелі, қазіргі сыртқы істер министрі Арзу Деуба Ранаға тиесілі жеке мектеп те өртелген.