Астана. 10 қыркүйек. BM.KZ — Маңғыстау облыстық көпбейінді ауруханасында ерекше медициналық жағдай сәтті аяқталды. Мамыр айында жүрегіне күрделі ашық операция жасалған жүкті әйел 8 қыркүйек күні аман-есен қыз баланы дүниеге әкелді. Бұл туралы облыстық аурухананың баспасөз қызметі хабарлады.
Босандыру отасын гинеколог-хирург Юлия Досаханова басқарған. Шамамен 30 минутқа созылған операция кесарь тілігі арқылы жасалып, еш қиындықсыз өтті. Отаға ассистент Алима Тапишова мен анестезиолог Серік Төкебаев қатысты.
1997 жылы туған науқас қыз баланы дүниеге әкелді. Сәбидің салмағы 2 келі 640 грамм, бойы 50 см. Қазіргі таңда, ана мен баланың жағдайы жақсы, дәрігерлер бақылауында.
Бүгінде келіншек өзін жақсы сезінетінін айтып, облыстық көпбейінді ауруханасының дәрігерлеріне алғысын білдірді.
«Мамыр айындағы алғашқы ота да, кешегі босандыру отасы да сәтті өтті. Өмірімді ақ халатты абзал жандарға сеніп тапсырмағанда, мұндай бақытты сәтті сезінбес едім. Дәрігерлердің біліктілігі мен мейірімділігінің, қолдауының арқасында қызымды аман-есен бауырыма басып отырмын. Аурухана дәрігерлері денсаулығымды әрдайым жіті бақылауда ұстады, қолдау көрсетіп, кеңесін айтты. Осы ретте аурухана басшылығына, дәрігерлер мен медбикелерге, соның ішінде кардиолог Алия Ахмадуллаевнаға және гинеколог Юлия Асенбаевнаға алғысым шексіз. Елдің алғысына бөленіп, жетістікке жете беріңіздер», – деді ол.
Айта кетейік, дәрігерлер оған митралды қақпақшаның жедел инфекциялық эндокардиті, митралды қақпақша жеткіліксіздігінің III-IV сатысы, өкпе гипертензиясы диагнозын қойған еді.