Астана. 12 қыркүйек. BM.KZ — Непалда апта басында басталған жаппай наразылықтарға байланысты министрлер мен олардың отбастарын эвакуациялау үшін әскери тікұшақтар қолданылды. Бұл туралы Times of India жазды.
Әлеуметтік желілерде тез тараған бейнежазбаларда шенеуніктер мен олардың туыстарын армия тікұшағына көтеріп жатқан сәт түсірілген. Ал төменде жиналған наразы жұрт бұл көріністі бақылап тұрғаны байқалады. Наразылық күндері түсірілген кейбір бейнематериалда қаржы министріне, сондай-ақ, сыртқы істер министрі Арзу Рана Деуба мен оның жұбайы, бұрынғы премьер-министр Шера Бахадур Деубаға шабуыл жасалған сәттер де көрініс тапқан.
Айта кетейік, жаппай тәртіпсіздіктер 8-9 қыркүйекте басталған еді. Оған үкіметтің бірқатар мессенджер мен әлеуметтік желілердің жұмысына шектеу қоюы себеп болған. Наразылықты студенттер мен Gen-Z жастар қозғалысының белсенділері бастап шықты.
Қоғамдық қысымның нәтижесінде елдің премьер-министрі Шарма Оли отставкаға кетті. Ал Gen-Z қозғалысы Непал Жоғарғы сотының бұрынғы төрайымы Сушила Каркиді уақытша үкімет басшысы қызметіне ұсынды.
Непал Денсаулық сақтау министрлігінің дерегінше, жаппай тәртіпсіздіктер кезінде қаза тапқандардың саны 51 адамға жетті, тағы 1 мыңнан астам адам жараланған. Полиция мәліметіне сай, елдегі түрмелерден 15 мыңнан астам тұтқын қашып кеткен. Мемлекеттік инфрақұрылымға келтірілген шығын көлемі 1,4 млрд доллардан асып отыр.