ШҚО. 15 қыркүйек. BM.KZ – Шығыс Қазақстан облысында қазба байлықты заңсыз талан-таражға салып жатқаны жайында видеожазба тарады. Бұл жағдай Үлкен Нарын ауданындағы Жайдақ шатқалында болған.
Бейнежазбада бір топ адамның жеңіл көлікпен келіп, таулы аумақта қазба жұмыстарын жүргізіп жатқаны анық көрінеді. Олардың бір бөлігі арнайы шатырлар тіксе, кейбірі тіпті киіз үй де құрып алған. Сонымен қатар, жазбада жер қазуға арналған ауыр техникалардың да пайдаланылып жатқаны байқалады.
Шағымданушылар жер қазып жатқандарды тәртіп сақшылары әдейі көздеріне ілмеуі мүмкін деп топшылайды.
Ал жергілікті полиция департаментінің мәліметінше, жыл басынан бері өңірде осындай 5 дерек тіркелген. Редакция сауалына жауап берген ведомство өкілдері аталған ақпаратқа байланысты тексеру жүргізілетінін хабарлады.
«Шығыс Қазақстан облысының полицейлері бұған дейін Жайдақ шатқалында заңсыз алтын және басқа да бағалы металдарды өндіру деректерін тоқтатқан болатын. Пайда болған ақпаратқа байланысты көрсетілген аумақта заңсыз әрекеттердің қайта жандануы мүмкіндігі бойынша полиция қосымша тексеріс жүргізеді», – дейді ШҚО полиция департаментінің баспасөз қызметі.
Жауаптылардың сөзінше, аумақтың таулы болуына байланысты ақпаратты тексеруге бірнеше күн кетеді. Ал бұған дейін анықталған заңбұзушылық бойынша қазір тергеу жүріп жатыр.
Редакция бұл ақпараттың барысын жіті қадағалайды.