Астана. 18 қыркүйек. BM.KZ – Қазақстан АҚШ нарығына азық-түлік экспорттау бағытында серпінді қадам жасады.
Алғашқы партиялар қазірдің өзінде Amazon платформасында сатылып жатыр. Нью-Йорк қаласына Eurasian Legacy бренді үшін 50 тонна бидай ұны жеткізілді.
Бұл – АҚШ-та ұлттық тауарларды ілгерілету жөніндегі жаңа стратегия аясында жүзеге асқан алғашқы ірі экспорттық жоба. Алдағы уақытта Сауда және интеграция министрлігі жанындағы QazTrade бірыңғай экспортты дамыту операторының қолдауымен жеткізілім көлемін айына 100 тоннадан астам ұнға дейін ұлғайту жоспарланып отыр. Өнім қазірдің өзінде Amazon және Walmart секілді ірі онлайн-платформаларда сатылып, бірқатар америкалық наубайханаларда ұсыныла бастаған.
Amazon-дағы бағасы – 1,36 келілік қаптамасы үшін $14,50. Қаптамада «Product of Kazakhstan» деген белгі қойылған. Бұл «Қазақстанда жасалған» брендісінің америкалық тұтынушылар арасындағы танымалдығын арттырып, еліміздің сапалы әрі экологиялық өнім жеткізуші ретіндегі имиджін қалыптастырады.
Онлайн-сатылымдардан бөлек, ұнды мейрамханаларға, кофеханаларға және жергілікті тамақтану желілеріне жеткізу бойынша келіссөздер жүргізілу үстінде. Сондай-ақ, Costco, Whole Foods және Trader Joe’s секілді АҚШ-тың ең ірі ритейл-желілеріне шығу мүмкіндігі қарастырылып жатыр.
«Біз тек ұнмен шектелмейміз. АҚШ-та қарақұмық, гранола, талқан, шоколад және какао да таныстырылды. Нью-Йорк, Чикаго және Вашингтон қалаларындағы серіктестер олардың сапасына көз жеткізді. Америкалық нарыққа шығу QazTrade-тің шілдеде Вашингтонда серіктестік кеңсе ашуының арқасында мүмкін болды. Бұл бізге дистрибьюторлар мен ритейлерлерге тікелей қол жеткізуге жол ашты. Келесі қадам – қазақстандық өндірушілердің осы қалаларға бизнес-миссиясы. Бұл әріптестік байланыстарды нығайтып қана қоймай, табиғи және аутентті өнімдерді жоғары бағалайтын HoReCa сегментінде өз орнымызды табуға мүмкіндік береді», – деді QazTrade бас директоры Айтмұхаммед Алдажаров.
Тұрақты келісімшарттар жасалған жағдайда ай сайын 100 тоннадан астам ұнды тұрақты түрде жеткізу жоспарланған. Бұл Қазақстанға АҚШ-тың астық өнімдері нарығында елеулі орын алуға мүмкіндік береді.