Астана. 18 қыркүйек. BM.KZ — Еңбек және халықты әлеуметтік қорғау вице-министрі Олжас Анафин Мәжілісте жасанды интеллекттің Қазақстан еңбек нарығына қандай қауіп төндіретінін айтты.
Оның сөзінше, өндірістік барысын автоматтандыру мен цифрландыруға деген жаһандық үрдіс еңбек нарығына барған сайын ықпал етіп келеді. Генеративті жасанды интеллекттің пайда болуы адам еңбегін ығыстырайын деп отыр.
Еңбек және халықты әлеуметтік қорғау министрлігі автоматтандыру мен жасанды интеллекттің Қазақстандағы жұмыспен қамтылуға әсерін бағалау мақсатында зерттеу жүргізген.
«423 кәсіптік топқа жүргізілген талдау көрсеткендей: жұмыс орындарының шамамен 25%-ына, яғни 2,2 миллион жұмыс орнына орташа және жоғары деңгейдегі автоматтандыру қаупі бар. Соның ішінде 1 миллионнан астамы генеративті жасанды интеллект арқылы алмастырылуы мүмкін. Ең үлкен қауіп Алматы, Астана және Шымкент сияқты ірі қалаларға тән, мұнда автоматтандыру жұмыс орындарының үштен біріне дейін әсер етуі ықтимал. Салалық тұрғыдан алғанда қаржы, ақпараттық технологиялар, ғылым және денсаулық сақтау ең осал болып отыр», – деп атап өтті спикер.
Алайда, Анафиннің сөзінше, жұмысшыларды жаппай шеттету болмайды.
«Қазақстанда еңбек құны салыстырмалы түрде төмен, сондықтан автоматтандыру барысы компаниялар экономикалық пайдасын көрген сайын біртіндеп жүзеге асады. Сонымен қатар, жаңа мамандықтар да пайда болады. Мысалы, дрондар мен роботтандырылған техниканың операторларынан бастап, деректер мен киберқұқық саласының мамандарына дейін», – деп түйіндеді Олжас Анафин.