Астана. 22 қыркүйек. BM.KZ – Қазақстанда «ҚТЖ-Жүк тасымалы» компаниясына монополиялық жағдайды теріс пайдаланғаны үшін 1,42 млрд теңге айыппұл салынды. Бұл туралы Бәсекелестікті қорғау және дамыту агенттігі хабарлады.
Агенттіктің мәліметінше, тергеу бірнеше экспедиторлық компания мен қауымдастықтардың шағымдары негізінде басталған. Тексеру барысында «ҚТЖ-Жүк тасымалы» жүк тасымалдау жоспарларын келісу кезінде өзінің аффилиирленген ұйымдары – KTZ Express пен КедентрансСервис компанияларына басымдық бергені анықталған. Бұл жеке экспедиторларға кедергі жасап, нарықтағы әділ бәсекелестікті шектеген.
2025 жылғы 22 тамызда Астана қаласының мамандандырылған ауданаралық әкімшілік соты компанияны кінәлі деп тауып, мемлекет кірісіне айыппұл төлеу туралы шешім қабылдады. Ал 15 қыркүйекте қалалық сот алғашқы шешімді өзгеріссіз қалдырды.
Агенттік мұндай шаралар отандық нарықта әділдік орнатуға және барлық кәсіпкерлер үшін тең жағдай жасауға бағытталғанын атап өтті.