Астана. 23 қыркүйек. BM.KZ – Грек-рим күресінен әлем чемпионы атанған Айдос Сұлтанғалиді жанкүйерлері елордалық әуежайда қарсы алды.
Загребте өткен күрес түрлерінен әлем чемпионатында грек-рим күресінен 60 келі салмақта топ жарған Айдос Сұлтанғали елге оралды. Чемпионды елорда әуежайында жанкүйерлер, Туризм және спорт вице-министрі Серік Жарасбаев және әскери оркестр қарсы алды.
«Қарсы алып жатқан барша қазақ жұртына алғысым шексіз! Ұзақ жылдардан кейін салған алтын жолым одан әрі жалғасын таба берсін деген тілегім бар. Финалдық белдесуге келетін болсақ, мұндай мүмкіндік келе бермейді. Сондықтан 6 минут бойы шабуылға ұмтылып, алтынды жұлып алу керек болды. Шүкір, қолдан келді. Енді алдағы уақыттағы басты мақсатым – 2028 жылғы Лос-Анджелес Олимпиада ойындары», — деді Айдос Сұлтанғали.
Финалда ол өзбек балуаны Әлішер Ғаниевті бір минутта таза жеңген еді. Айдос Сұлтанғали бұған дейін әлем чемпионатында екі мәрте қола жүлдегер атанған.
Ұлттық құраманың бас бапкері Қонысбек Төкенов 26 жылдан кейін ересектер арасында қазақ балуанының әлем чемпионы атануы – тарихи жеңіс екенін атап өтті.
Жарыста грек-рим күресінің қазақстандық шеберлері жалпы 29 белдесу өткізіп, 16 жеңіске қол жеткізді. Енді балуандарды 2026 жылы Жапониядағы Азия ойындары мен Бахрейндегі әлем чемпионаты күтіп тұр.