Астана. 24 қыркүйек. BM.KZ – Украина президенті Владимир Зеленский соңғы аптада тағы да Дональд Трамп пен Владимир Путинмен алдын ала шартсыз үшжақты немесе екіжақты форматта кездесуге дайын екенін мәлімдеді.
Fox News-ке берген сұхбатында Зеленский Украина, Батыс елдерінің көшбасшылары, соның ішінде Франция президенті Эммануэль Макрон мен Түркия басшылығы Кремльге Украина мен Ресей президенттерінің кездесуін бірқатар елдерде өткізуді ұсынғанын айтты.
«Біз кездесуді Түркияда, Сауд Арабиясында, Катарда, Еуропадағы бейтарап елдер – Австрия мен Швейцарияда өткізуге ұсыныс жасадық. Біз тіпті: «Егер Қазақстанда өтсін десеңіздер – оған да дайынбыз» дедік. Бар болғаны осы», – деді Украина басшысы.
Журналист қойған нақтылау сұрағына Зеленский Ресей президентімен кездесуге әзір екенін тағы бір қайталап айтты. Алайда ол келіссөздің Мәскеуде өтуіне қарсылығын білдірді.
Бұған дейін Владимир Путин «егер Зеленский кездескісі келсе, Мәскеуге келсін» деген еді. Украина басшысы бұл ұсыныстан бас тартып, Путинді Киевке шақырған болатын.
Еске сала кетсек, бұдан бұрын Қазақстан Президенті Қасым-Жомарт Тоқаев БҰҰ Бас Ассамблеясының 80-сессиясы аясында Владимир Зеленскиймен кездескен болатын. Әңгіме барысында Украина көшбасшысы еліндегі жағдайға қатысты өз ұстанымын баяндады. Ал Тоқаев бұл аса күрделі кезеңде қақтығысты тоқтатудың жолдарын іздеу үшін дипломатиялық жұмысты жалғастыру қажеттігін атап өтті.