АСТАНА. 24 қыркүйек. BM.KZ – АҚШ Президенті Дональд Трамп БҰҰ Бас Ассамблеясы аясында сөйлеген сөзінде НАТО елдері өздерінің әуе кеңістігін бұзған ресейлік әскери ұшақтарды атып түсіруге құқылы екенін мәлімдеді. Бұл туралы Deutsche Welle хабарлайды.
«Ресейлік ұшақтар НАТО әуе кеңістігін бұзса, оларды атып түсіру керек пе?» — деген журналистің сауалына Трамп: «Иә, мен келісемін», — деп жауап берді. Алайда АҚШ президенті мұндай жағдайда Вашингтон одақтастарына көмек көрсете ме деген сұраққа нақты жауап бермей, «Бұл жағдайға байланысты» деп қысқа қайырды.
Трамп бұл пікірін 23 қыркүйекте Нью-Йоркте өткен БҰҰ Бас Ассамблеясының алаңында Украина Президенті Владимир Зеленскиймен бірлесе өткен брифинг барысында айтты.
БАҚ алдында сөйлеген сөзінде Дональд Трамп Ресей мен Украина арасындағы толыққанды соғыстың жуық арада аяқтала қоймайтынын жеткізді. Оның айтуынша, Ресей экономикасы күннен күнге күйреп жатыр және Украина өз аумағын батыл қорғап келеді.
«Қазіргі ең үлкен ілгерілеу – Ресей экономикасының өте нашар халде екені. Ол күйреу үстінде. Ал Украина болса, бұл алып армияны тоқтату жолында өте жақсы жұмыс атқарып жатыр», — деді АҚШ президенті.
Өз кезегінде Украина президенті Владимир Зеленский соңғы бір ай ішінде украин әскерінің 360 шаршы шақырым жерді босатқанын, сондай-ақ мыңдаған ресейлік әскерді қоршауға алғанын айтты. Киев бұл сарбаздарды болашақта украиналық тұтқындарға айырбастауды жоспарлап отыр.
Сондай-ақ Зеленский Еуропа елдерінің ресейлік мұнай мен газды сатып алуды тоқтатуы туралы Трамптың ұсынысын толық қолдайтынын айтты:
«Ресейдің энергия көздерінен бас тарту – соғысқа қарсы қысымды күшейтудің нақты жолы. Біз бұл бастаманы толық қолдаймыз, Президент мырза», — деді Зеленский.
23 қыркүйекте Брюссельде өткен Солтүстік Атлантикалық кеңестің (НАТО) отырысында альянс мүше мемлекеттерінің әуе кеңістігін бұзған Ресей ұшақтары мен дрондарына қатысты ортақ мәлімдеме жасалды.
«НАТО барлық қажетті әскери және бейбіт құралдарды пайдалана отырып, халықаралық құқық аясында өз қауіпсіздігін қорғауға және кез келген бағыттағы қауіп-қатердің алдын алуға дайын», — делінген мәлімдемеде.
Аталған отырыс Эстонияның бастамасымен шақырылған. Бұған себеп — 19 қыркүйекте үш ресейлік жойғыш ұшақтың Эстония әуе кеңістігін бұзуы. Бұл соңғы екі аптада Ресейдің әрекетіне байланысты өткізілген екінші отырыс.
Бұған дейін де Польша 19 ресейлік дронның өз аумағына енуіне байланысты кеңес шақырған болатын. Осыдан кейін НАТО «Шығыс Қорғаушысы» (Eastern Guardian) атты жаңа қорғаныс миссиясын іске қосты.