Астана. 24 қыркүйек. BM.KZ – Ресейдің Сыртқы істер министрлігінің өкілі Мария Захарованың Қазақстан Президенті Қасым-Жомарт Тоқаев пен Украина Президенті Владимир Зеленскийдің кездесуі туралы пікірін білдірген бейнежазба – дипфейк. Бұл жөнінде Ресейдің сыртқы саясат мекемесі мәлімдеді, деп хабарлайды «Коммерсант».
– Бұл – әдейі Қазақстанның ақпараттық кеңістігіне тасталған, шындыққа жанаспайтын, өрескел әрі арандатушылық сипаттағы жалған материал, – делінген ресми хабарламада. – Мұндай әрекеттердің түпкі мақсаты – Ресей мен Қазақстан арасындағы достыққа сызат түсіріп, екі ел халқының арасына іріткі салу, қоғамда қайшы пікір тудыру.
Желіде тараған бейнежазбада Мария Захарова Нью-Йоркте БҰҰ Бас Ассамблеясының отырысы барысында Қасым-Жомарт Тоқаев пен Владимир Зеленский кездескені туралы пікір айтқандай көрінеді.
Жасанды бейнеде сөз сөйлеп тұрған адам: «Тоқаев пен Зеленский ашық түрде Ресейге қарсы бағыт ұстанды: олар өзара орыс тілін білсе де, ағылшын тілінде сөйлесті. Оның өзінде де ағылшын тілін нашар қолданды», – деген пікір білдіреді.
Алайда Ресей Сыртқы істер министрлігі бұл бейнематериалдың түп-түгел жалған екенін атап өтті.
«Бұл жалған бейнеде айтылған бірде-бір сөз шындыққа сәйкес келмейді», – деп мәлімдеді ведомство.
Министрліктің түсіндіруінше, бейнежазба жасанды интеллект арқылы жасалған: Захарованың сөйлеу ырғағы мен бет қимылдары цифрлық жолмен өңделіп, шын видеоның үстіне оның дауысын елестететін жалған дыбыс жабыстырылған. Бұл жалған материал оның маусым айында Санкт-Петербургтегі экономикалық форумда ресейлік басылымға берген сұхбаты негізінде құрастырылған.