Астана. 25 қыркүйек. BM.KZ – 23 қыркүйекте Алматы әуежайында жолаушылардың бірі әйгілі актер әрі жекпе-жек өнерінің шебері Джеки Чанды байқап қалып, суретке түсіріп үлгерген. 71 жастағы актердің Қазақстанға келген сәті әлеуметтік желіде кеңінен талқыланып жатыр, деп хабарлайды Курсив.
Желілердегі ақпаратқа сүйенсек, Чанды Salem Entertainment медиакомпаниясының өкілдері күтіп алған. Бұл медиакомпания «5:32», «Черный двор», «Шекер» сияқты танымал телехикаяларды түсірген.
Қазірге дейін ресми ақпарат берілген жоқ. Дегенмен жарияланған видеолардан Чанның шынымен Қазақстанға келгенін көруге болады. Алдын ала деректер бойынша, ол бір кино жобаға қатысуы мүмкін.
Айта кетейік, бұған дейін Қазақстанда әлемдік жұлдыздардың қатысуымен бірқатар халықаралық кино жобалар жүзеге асырылып жатқаны хабарланған. Бұл туралы Үкімет отырысында Salem Entertainment медиакомпаниясының бас директоры Игорь Цай мәлімдеген еді.