Астана. 25 қыркүйек. BM.KZ – БҰҰ Бас Ассамблеясы аясында өткен кездесуде АҚШ мемлекеттік хатшысы Марко Рубио Ресей сыртқы істер министрі Сергей Лавровқа АҚШ президенті Дональд Трамптың Кремльге жолдаған үндеуін қайталап, Украинадағы соғысты тоқтату үшін «елеулі қадамдар» жасауға шақырды, деп хабарлайды Deutsche Welle.
АҚШ Мемлекеттік департаменті баспасөз қызметі басшысының орынбасары Томми Пиготтың жазбаша мәлімдемесінде атап өтілгендей, Рубио Лавровпен Нью-Йоркте өткен 50 минуттық жабық кездесуде Ресейдің Украинаға қарсы агрессиясын тоқтатудың маңыздылығын жеткізген.
Кездесуден кейін Сергей Лавров журналистерге сұхбат бермей, тек бас бармағын көтеріп жауап қатты.
Ресей СІМ Telegram-арнасында ведомство басшысы «Ресей мен АҚШ лидерлері Аляскада жасаған келісімдерді ұстануға дайын екенін, Украина қақтығысының түпкі себептерін жою бағытында америкалық тараппен үйлесімді жұмыс жүргізуге әзір екенін» мәлімдегенін хабарлады. Сонымен бірге, Лавров «Киев пен бірқатар еуропалық астаналар алға тартып отырған, қақтығысты созуға бағытталған схемалардың мүлдем қабылданбайтынын» жеткізген.
23 қыркүйекте БҰҰ Бас Ассамблеясында сөйлеген сөзінде Дональд Трамп «Ресей мен Украинаның қақтығысын реттеуге бар күшін салып жатқанын» айтты. Оның айтуынша, бұл қақтығысты тоқтату «ең оңай шаруа» болады деп үміттенген, себебі Ресей президенті Владимир Путинмен «жақсы қарым-қатынасы» бар еді.
— Барлығы Ресей бұл соғысты үш күнде жеңеді деп ойлады. Бұл жай ғана қысқа қақтығыс болады деп есептелді. Бірақ бәрі басқаша өрбіді. Бұл Ресейді жаман жағдайда көрсетіп отыр, — деді Трамп.
Сол күні бірнеше сағаттан кейін Дональд Трамп Украина президенті Владимир Зеленскиймен жеке кездескеннен соң, өзінің Truth Social желісінде «Украина Еуроодақтың қолдауымен барлық жерін бастапқы шекарасына дейін қайтарып ала алады» деп жазды.
— Уақыт, сабыр және Еуропа мен әсіресе НАТО-ның қаржылай қолдауымен соғыс басталған шекараларды қалпына келтіру әбден мүмкін. Ресей бұл мағынасыз соғысты үш жарым жылдан бері жалғастырып келеді. Ал мықты әскери держава мұндайды бір аптаға жеткізбей аяқтар еді, — деді АҚШ президенті.
Айта кетейік, бұл мәлімдеме Трамптың бұған дейінгі «соғысты тоқтату үшін Киев аумақтық талаптардан бас тартуы мүмкін» деген сөздеріне қарама-қайшы болды.