Астана. 25 қыркүйек. BM.KZ – Қаржы мониторингі агенттігінің (ҚМА) Алматы қаласы бойынша департаменті «Amir Capital» қаржы пирамидасын құру және оны басқару дерегі бойынша тергеу жүргізіп жатыр.
Ресми мәліметке сәйкес, өзін халықаралық инвестициялық қор ретінде таныстырған компания үш жыл бойы Қазақстан, Беларусь, Ресей және Қырғызстан азаматтарынан қаражат тартқан. Ұйымдастырушылар криптовалюта саудасы, майнинг және түрлі жобаларға инвестициялау арқылы айына 5–10% табыс табуға уәде берген.
Инвесторлар компанияның ресми сайты арқылы реферальды сілтемелер бойынша тіркелген. Жеке кабинеттерге салымдар USDT, BTC, ETH секілді криптовалюталармен Amir Wallet әмияны арқылы енгізілген.
ҚМА мәліметінше, түскен қаражат классикалық қаржы пирамидасының принципі бойынша бөлініп отырған: яғни бұрын тіркелген қатысушыларға төлемдер кейінгі салымшылардың қаржысы есебінен төленген. Нәтижесінде аталған схемаға 40-тан астам адам тартылған.
2021 жылдың соңында салымшылардың amir.capital платформасындағы жеке кабинеттерінен қаражат шығару мүмкіндігі шектелген. Ұйымдастырушылар бұл жағдайды техникалық ақаулармен түсіндіріп, төлемдердің қайта басталатынын айтқанымен, қаражатқа қол жеткізу мүмкіндігі қалпына келтірілмеген.
Сот санкциясымен құны 10 млн АҚШ долларынан асатын криптоактивтер мен Алматы облысындағы жер телімі бұғатталды.