Астана. 25 қыркүйек. BM.KZ – Қазақстан Ауыл шаруашылығы министрі Айдарбек Сапаров сүт өнімдері нарығына қатысты мәлімдемесі үшін сынға ілікті. Белгілі блогер Кирилл Павловтың айтуынша, министрдің «Қазақстан өзін толықтай сүт өнімдерімен қамтамасыз етіп отыр» деген сөзі шындыққа жанаспайды.
Павлов ресми статистиканы келтіріп, тек өткен жылы елге 183 мың тонна сүт пен сүт өнімдері импортталғанын атап өтті. Осыған байланысты ол министрдің үстінен Астана қаласы Полиция департаментіне арыз түсіріп, істі Президент Әкімшілігінің бақылауына алуды сұрады.
Еске салайық, бұл Павловтың алғашқы дауы емес. Бұған дейін ол елде шегіртке қаптағанын жариялағаны үшін сот шешімімен 78 640 теңге айыппұл төлеген болатын. Ол кезде Ауыл шаруашылығы министрлігіне қарасты фитосанитарлық орталық блогердің сөзін жоққа шығарып, полицияға арызданған еді.
Сүт дауы қоғам назарын аударып отыр, себебі екі апта бұрын Мемлекет басшысы Қасым-Жомарт Тоқаев та азық-түлік қауіпсіздігі мәселесін қатты сынға алған болатын. Президент «100% өзін-өзі қамтамасыз ету мүмкін емес әрі қажет те емес, алайда қазіргі нарықтағы жағдай – ұятты көрініс» деп атап өтіп, әсіресе сүт өндірісінде отандық өнімнің шетелдік тауарға жол беріп жатқанын сынға алды.
Соған қарамастан, 23 қыркүйекте министр Сапаров тағы да мәлімдеме жасап, мал шаруашылығы бойынша 100% қамтамасыз етілуге қол жеткізілгенін айтты. Оның сөзінше, бұл көрсеткішке ет (сиыр, қой, жылқы еті), сүт өнімдері және жұмыртқа өндірісі кіреді.
Аграрлық саладағы қайшылықты деректер қоғамда қызу талқылануда. Сарапшылардың айтуынша, сүт өнімдері импорты сақталып отырған жағдайда министрдің мәлімдемесі нарықтағы нақты жағдайды толық көрсетпейді.