Астана. 25 қыркүйек. BM.KZ — Қазақстан Республикасы Ішкі істер министрлігінің (ІІМ) киберқылмысқа қарсы іс-қимыл департаменті Украинаның Ұлттық полициясы және Бас прокуратурасы, сондай-ақ Қазақстанның Бас прокуратурасымен бірлесіп трансұлттық алаяқтық топтың жолын кесті.
23 қыркүйекте Черновцы мен Одесса қалаларында ұзақ мерзімді бірлескен жедел іс-шаралар нәтижесінде Қазақстан азаматтарын алдаумен айналысқан call-орталық толық жойылды.
Қылмыскерлер алдын ала құрылған схема бойынша әрекет еткен. Олар жәбірленушілерге Қазақстанның Ұлттық Банкі, құқық қорғау органдары мен арнайы қызметтері атынан қоңырау шалып, “күдікті операциялар” және “террористік ұйымдарды қаржыландыру” үшін қылмыстық жауапкершілікке тартамыз деп қорқытып, азаматтарды несие алуға, мүлкін сатуға және депозиттегі қаражатты дроптардың шотына аударуға мәжбүрлеген. Осылайша психологиялық қысым көрсеткен.
Қылмыстық топ нақты иерархиядан тұрған: әкімшілер, HR-менеджерлер, “клоузерлер”, техникалық қызметкерлер, тіпті “күштік блок” болған.
Бір мезгілде күдіктілердің тұрғылықты мекенжайлары бойынша және call-орталықтың өзінде жүргізілген тінту барысында 30-дан астам компьютерлік техника, 79 ұялы телефон, SIM-карталар, киім-кешек, Құқық қорғау және арнайы органдардың, Ұлттық банктің қызметкерлерінің жалған куәліктері, алдын ала дайындалған сценарийлер және Deepfake технологиясы арқылы бейне мен дауысты өзгертуге арналған арнайы бағдарламалар табылды.
Алдын ала мәлімет бойынша қаскүнемдер Қазақстан тұрғындарын 900 миллион теңгеден астам сомаға алдаған. Ұйымдастырушылар айына 60 мың АҚШ долларын жұмсаған, ал күдіктілердің бірі соңғы алты айда бес автокөлік сатып алған.
Арнайы операция нәтижесінде Украинаның тоғыз азаматы ұсталып, оның бесеуі қамауға алынды.
— Бұл операция екі елдің құқық қорғау органдарының үйлесімді іс-қимылының арқасында жүзеге асты. Мұндай қадам трансұлттық қылмыстық топтардың қызметін тоқтатуға және азаматтардың қауіпсіздігін қамтамасыз етуге бағытталған, — деді ҚР ІІМ киберқылмысқа қарсы іс-қимыл департаменті бастығының орынбасары Аслан Өскембаев.