Астана. 25 қыркүйек 2025 жыл. — Иранда Азиядағы ең үлкен тұзды көл болып саналатын Урмия көлінің толығымен құрғап кеткені туралы Bild хабарлады. Бұл көлдің жас мөлшері шамамен 4000 жылдан асады.
1980 жылдары көлдің ұзындығы 140 шақырым, ал ені 55 шақырым болған. Ал 2025 жылдың жазына дейін жерсеріктен алынған соңғы суреттерде бұрынғы көл орнында бірнеше шалшық қалған.
Iran News Update мәліметінше, Иранда миллионнан астам заңсыз құдық бар, олар жылдар бойы жер асты суларын сарқып, табиғи су балансын бұзған. Сонымен қатар, ауыл шаруашылығының сұранысы да жағдайды ушықтырды: елдің су ресурстарының 88%-ын ауыл шаруашылығы тұтынады, бірақ ол жалпы ішкі өнімнің небәрі 10%-ын береді. Нәтижесінде Иран жыл сайын табиғи ресурстардың қалпына келтіру мүмкіндігінен 43 млн текше метрге артық су пайдаланады.
Урмия көлінің құрғауы жүздеген мың тұрғынның өміріне айтарлықтай әсер етті. Аймақта топырақ тозып, тұзды дауылдар жиілеп, ауыл шаруашылығын жүргізу мүмкіндігі күрт төмендеді. Бұл жағдай экологиялық дағдарысқа әкеліп, аймақ халқының тұрмысын қиындатып отыр.
Эколог мамандардың пікірінше, Урмия көлінің күйі — тек Иран үшін ғана емес, бүкіл Орта Азия экожүйесі үшін елеулі қауіптің белгісі. Көлдің құрғауы су ресурстарын ұтымды пайдалану мен халықаралық ынтымақтастықтың маңыздылығын тағы бір мәрте дәлелдеп отыр.