Астана. 29 қыркүйек. BM.KZ — LRT жүргізушісіз қозгалады. Сынақ барысында мамандар рельстерді, станцияларды, байланыс желілерін, жылжымалы құрамды, қауіпсіздік пен қозғалысты басқару жүйелерін тексереді, деп хабарлайды CTS баспасөз қызметі.
29 қыркүйектен бастап Астанада жеңіл рельсті көлік жүйесінің сынақтық пайдалануы басталды. Ерекше назар қызметкерлерді дайындауға, төтенше жағдайлардағы іс-қимылдарға және LRT-ны басқа көлік түрлерімен интеграциялауға аударылады.
LRT құрамдары GoA4 аппараттық-бағдарламалық кешенімен жабдықталған – бұл толық автоматтандырылған басқару жүйесі: қозғалыс, арақашықтықты сақтау, тоқтау, есіктерді ашу және жабу, деподан шығу және кіру, жуу жұмыстары оператордың қатысуынсыз жүзеге асырылады.
«City Transportation Systems» ЖШС басқарма төрағасы Асылбек Дуйсебаевтың айтуынша GoA4 – рельсті көліктің ең жоғары деңгейдегі автоматтандыру жүйесі. Жаңа желілер салу немесе бар желілерді жаңарту кезінде көптеген қалалар осыған ұмтылады. Метро және LRT жүйелері үшін бұл тиімділікті, қауіпсіздікті арттыруға және басқа көлік түрлерімен салыстырғанда бәсекеге қабілеттілікті қамтамасыз етеді. Қазір GoA4 Сингапурда, Дубайда және Қытайда енгізілген. Астанада да осындай заманауи деңгей іске асырылатын болады.
Жабдық пен инфрақұрылымды кешенді сынау кемінде алты айға созылады. Бірінші кезеңде тестілеу №112–№113 станциялары арасында басталады. Пойыздар бастапқыда 10 км/сағ жылдамдықпен қозғалып, кейін жылдамдық пен сынақ аймақтары кезең-кезеңімен артады. Бұл ең жоғары қауіпсіздікті қамтамасыз етуге, рельстерді мұқият тексеруге және біртіндеп жобалық параметрлеріне өту үшін қажет.
– Біз екі елде – Қазақстанда және Қытайда оқудан өттік. Теориялық білімімізді нығайтып, электропойызды басқарумен қатар төтенше жағдайларда әрекет ету секілді практикалық дағдыларды үйрендік. Қазір үшінші модульге – LRT сынақтарына тікелей қатысуға кірістік. Біз тежегіш, тарту және автоматты жүргізу жүйелерін зерттейміз. Бізге LRT поездарын бірінші болып басқару құрметі берілді. Бұл заманауи көлік түрі, Қазақстан үшін маңызды қадам. Біз өз жауапкершілігімізді түсінеміз және жүйені іске қосуға қатысқанымызды мақтан тұтамыз, деді LRT поездарын басқарушы Айдын Ахмедин.
Қауіпсіздік мақсатында эстакадаға және жол желісіне кіруге қатаң тыйым салынады, себебі байланыс желісі 750V жоғары кернеумен жабдықталған және ол адам өміріне қауіпті.