Астана. 29 қыркүйек. BM.KZ — Астана қаласында нашақорлыққа қарсы 30 күндік барлау іс-шаралары күшейтілді. Бұл шаралар қала тұрғындарының қауіпсіздігін қамтамасыз етуге және есірткі қылмысына қарсы күресті жүйелі түрде жүргізуге бағытталған.
Байқоңыр ауданының полиция басқармасы және прокуратура қызметкерлері «Astana jastary» еріктілер ұйымымен бірлесе есірткі тасымалдаушыларды ұстау мақсатында Өндіріс ауданына барлау жұмысын жүргізді. Барлау барысында полиция қызметкерлері мен еріктілер күдікті тұлғаларды бақылап, жасырын қоймалар мен тасымал жолдарын анықтауға басымдық берді. Иісшіл иттердің көмегімен бірнеше аула мен бос ғимарат тексерілді. Барлық әрекеттер қатаң жоспар бойынша жүргізіліп, қауіпсіздік шаралары толық сақталды. Сонымен қатар, тұрғындардан түскен хабарламалар мен шағымдар да назарға алынды.
Полиция қызметкерінің айтуынша, «көпшілік есірткі тұтынатын адам мен есірткі тасымалдаушыны ажырата алмайды. Жер-жерді тіміскілеп, шөптің арасын тырмалап жататындар – нашақорлар. Ал заттарды жеткізіп берушілер бөлек. Барлауда есірткі тасымалдаушыларды бақылауға шықтық. Өндіріс ауданында есірткі тасымалдау бойынша бірнеше оқиға тіркелген».
Қазіргі кезде есірткі тасымалдаушылардың көпшілігі жастарды пайдаланып, «курьер» қызметіне тартатыны анықталды. Олар әлеуметтік желілер арқылы байланысып, жеңіл табыс уәде етеді. Есірткі сатумен айналысатын топтар осылайша жымысқы әрекеттерін жүзеге асыруға тырысады. Бірақ бұл – қылмыс, және мұндай әрекеттердің соңы ауыр жазамен аяқталады. Полиция мен прокуратура қызметкерлері тұрғындарды ақпараттандыруға ерекше мән беріп, жастар арасында профилактикалық жұмыстар жүргізуде. Оқу орындарында құқықтық тренингтер өткізіліп, нашақорлықтың зияны мен алдын алу жолдары түсіндірілуде.
Есірткі бизнесі бұрынғыдай ашық жүрмейді. Көбіне жасырын орындарға қалдырып кетіп, кейін тұтынушыларға мекенжайын хабарлайды. Құқық қорғау органдары интернеттегі қауіпті топтарды анықтап, жою жұмыстарын жүргізуде. Сонымен қатар, тұрғындардың хабарламаларын қабылдайтын сенім телефондары жұмыс істейді, азаматтардың күмәнді әрекеттерді хабарлауы үшін қолайлы жағдай жасалған. Полиция мен еріктілердің бірлескен рейдтері арқылы қаланың әртүрлі аудандарында жасырын қоймалар мен көлік жолдары тексеріліп, есірткі тасымалының жолдары анықталуда.
Астанада «Заң және тәртіп» қағидаты аясында есірткі қылмысына қарсы айлық жалғасуда. Құқық қорғау органдары бірлескен рейдтер өткізіп, оқу орындарында профилактикалық кездесулер ұйымдастырады, сондай-ақ тыйым салынған заттарды тарататын интернет-ресурстарды анықтау және жою жұмыстарын жүргізуде. Бұл іс-шаралар жастардың құқықтық сауаттылығын арттыруға бағытталған, оларды нашақорлықтың қауіпті салдарынан сақтайды. Ата-аналар мен педагогтар өз тарапынан балалардың қауіпсіздігіне ерекше назар аударуға шақырылады.
Мұндай іс-шаралар халықтың хабардарлығын арттыруға, құқық қорғау органдары мен қоғам арасындағы сенімді нығайтуға, сондай-ақ есірткі қылмысына және өзге де қоғамдық қауіпсіздікке төнген қатерлерге қарсы бірлесіп күресуге маңызды ықпал етеді. Полиция қызметкерлері мен еріктілердің әріптестігі қоғамдағы қауіпсіздік мәдениетін қалыптастыруға септігін тигізеді, ал тұрғындардың белсенділігі осындай күрестің табысты өтуіне тікелей әсер етеді. Барлау жұмыстары тек ұстап-тергеуге ғана емес, сонымен қатар профилактика және түсіндіру жұмыстарына да бағытталған.
Астана қаласының құқық қорғау органдары алдағы уақытта да мұндай барлау іс-шараларын тұрақты түрде жүргізіп, қаланың әр ауданына қауіпсіздік пен тәртіпті қамтамасыз ету үшін бақылауды күшейтуді жоспарлап отыр.