АСТАНА. 1 қазан. BM.KZ – Ақ үй басшысының айтуынша, ол Нобель сыйлығын өзі үшін емес, АҚШ үшін алғысы келеді. Бұл туралы Deutsche Welle хабарлады.
2025 жылғы Нобель сыйлығының иегері жариялануына он күн қалғанда АҚШ президенті Дональд Трамп бұл марапаттың өзіне берілуі керегін сөз етті. Оның пікірінше, басқа біреуге беру – «АҚШ-ты қорлау» болмақ. Трамп бұл сөзін 30 қыркүйекте Вирджиния штатындағы Куантико әскери базасында жоғары лауазымды америкалық әскери қызметкерлермен кездесуде айтты.
Оның сөзінше, ол сыйлықты жеке басына емес, Америка Құрама Штаттарына беруді қалайды.
Трамп президенттікке келген сәттен бастап жеті соғысты тоқтатқанын бірнеше мәрте қайталады. Ол бұл ретте Үндістан мен Пәкістан, Мысыр мен Эфиопия, сондай-ақ Сербия мен Косово арасындағы қақтығыстарды мысалға келтірді.
БҰҰ Бас ассамблеясының 80-сессиясы кезінде Нью-Йоркте өткен кездесуде Украина президенті Владимир Зеленский DW тілшісінің сұрағына жауап бере отырып, егер Трамп Ресейдің соғысын тоқтатса, оны Нобель сыйлығына ұсынуға уәде берді.
«Трамптың бұл соғысты аяқтауға мүмкіндігі бар. Егер ол шынымен тоқтатса – украиндықтар оны қуана-қуана қолдайтынына сенімдімін», – деді Зеленский.
DW тілшісінің «Киев сізді номинациялай ала ма?» деген сұрағына Трамп: «Неге болмасқа», – деп жауап қатты.
Соңғы жылдары Трамп бірнеше мәрте Нобель бейбітшілік сыйлығына ұсынылған. Атап айтқанда, Израиль премьер-министрі Биньямин Нетаньяху АҚШ президентінің Газа секторындағы соғысты тоқтату жолындағы еңбектерін атап, оны сыйлыққа лайық деп санаған. Сондай-ақ осындай қадамға Пәкістан билігі де барған болатын.