Астана. 3 қазан. BM.KZ – Қаржылық мониторинг агенттігінің мәліметінше, 2024 жылдың басынан бері елде заңсыз майнингке қатысты 17 қылмыстық іс тіркеліп, мемлекетке келтірілген залал көлемі 1,3 млрд теңгеге жеткен.
Тергеу барысында заңсыз айналымнан 642 мың АҚШ доллары көлеміндегі цифрлық активтер тәркіленді. Ең көп жағдайлар Астанада (6), Шымкент пен Қостанайда (әрқайсысында 3) анықталды.
— Кейбір заңсыз майнинг фермалары электр энергиясын ұрлау арқылы жұмыс істеген (5 ферма). Олардың тұтынған энергия көлемі ірі қаланың шығынына тең. Сондай-ақ фермалар орналасқан аймақтардағы тұрғындардың тыныштығын бұзу фактілері тіркелген. Электр энергиясын заңсыз тұтыну салдарынан ресурстар нақты бизнес-жобаларға, өнеркәсіпті дамытуға және әлеуметтік нысандарды қамтамасыз етуге бағытталмайды, — делінген хабарламада.
Мемлекеттік кірістер комитетінің мәліметінше, соңғы үш жылда майнинг саласынан бюджетке 17 млрд теңгеден астам қаражат түскен. Бұл салада тиімді реттеу қажеттілігі атап өтілді.
Агенттік Қазақстанда майнингпен айналысу тек лицензия негізінде рұқсат етілетінін еске салды. Заңды жұмыс үшін жабдықтың сәйкестігі, энергиямен жабдықтау шарты және салықтық міндеттемелер орындалуы қажет.
Заңсыз майнинг қылмыстық жауапкершілікке әкеліп қана қоймай, елдің экономикалық қауіпсіздігіне қауіп төндіреді, деп ескертті агенттік.