Астана. 3 қазан. BM.KZ – Солтүстік Қазақстан облысындағы «Құлагер» хоккей клубының басшысы Сергей Филь іздестіріліп жатыр. Бірнеше хоккейші оған алаяқтық фактілері бойынша шағымданған.
Клуб директоры Игорь Шерстовтың айтуынша, Сергей Филь өткен жылдың желтоқсан айында жұмысқа қабылданып, жарыстар мен жаттығуларды ұйымдастыруға жауапты болған. Алайда 24 қыркүйектен бастап жұмысқа шықпай қойған.
— Оны іздеу барысында алаяқтық фактілері анықталды. Ол туралы айта алмаймын, полицияға арыз жазылды, тергеу барысында бәрі анықталатын болады. Мен ақша беріп немесе алып жатқанын көрген жоқпын, сол себепті бейхабармын. Қазір оның бұрынғы криминалдық өмірі жарыққа шығып жатыр, бұл адам бізге ресми түрде жұмысқа тұрды, еңбекақысынан барлық міндетті төлемдер алынып отырды, — деді Игорь Шерстов.
Петропавл қалалық полиция басқармасының дерегінше, күдікті екі және одан да көп адамға алаяқтық жасағаны үшін тергеліп жатыр.
— Петропавл қалалық полициясына «Құлагер» командасының бірнеше хоккейшісі арызданды. Бұл факті бойынша Астана қаласының 45 жастағы тұрғынына қатысты сотқа дейінгі тергеу басталды. Қазіргі уақытта оның жүрген жерін анықтау және ұстау бойынша жедел-тергеу жұмыстары жүргізіліп жатыр, — деді тергеу бөлімінің бастығы Азамат Бектұрғанов.
Қалған мәліметтер ҚР Қылмыстық-процестік кодексінің 201-бабына сәйкес жарияланбайды.