Астана. 6 қазан. BM.KZ – Марқұмның туыстары Қазақстан Президентінен көмек сұрады.
Алматыда әскери борышын өтеп жүрген 19 жастағы сарбаз қызмет барысында көз жұмды.
– Биыл күзде біздің ініміз Нұрасыл (2006 жылғы 16 желтоқсанда туған) әскерге аттанды. Ол 2025 жылғы 27 қыркүйекте шақырылып, Алматы қаласындағы Қарасай шекара қызметіне, Спасская көшесі 67 мекенжайы бойынша жіберілген еді.
Бүгін, 5 қазан — ол әскерге кеткеніне тура бір апта толды. Өкінішке қарай, осы аз ғана уақыттың ішінде біз оны жоғалттық. Жүрегіміз бір жамандықты сезгендей, жібергіміз келмеген. Бірақ Нұрасыл Отанына адал қызмет етуді, нағыз патриот болуды армандады. Ол әскерді ерлік пен ержүректік мектебі деп білді, бейбіт күнде адам өмірі қиылады деп ойлаған емес.
Нұрасыл – мейірімді, жарық жүзді, адал, айналасындағыларға қамқор жігіт еді. Өмірді сүйетін, әділдікке сенетін, – деп жазды әпкесі Instagram парақшасында.
Оның қазасы отбасы үшін орны толмас қайғы болды.
– Егер анасы тірі болғанда, мұндай қасіретті көтере алмас еді… Біз, Нұрасылдың отбасы, Қазақстан Республикасының Президенті Қасым-Жомарт Кемелұлы Тоқаевқа үндеу жолдаймыз. Осы оқиғаға өзіңіздің жеке назарыңызды аударуыңызды өтінеміз. Біз мемлекетке сендік, балаларымыздың қауіпсіздігіне сенім арттық. Бірақ неге бейбіт уақытта осындай жас жігіттер қаза табады? Бізге шындық пен әділдік қажет. Бұл жай ғана бір отбасының қайғысы болып қалмасын. Мұндай жағдай енді қайталанбасын дейміз, – делінген хабарламада.
Қазақстанның Алматы қаласында орналасқан шекара қызметі бөлімінде қайғылы жағдай орын алды. Жақында әскери қызметке шақырылған жас сарбаз қызметін бастағанына бір апта толмай жатып қайтыс болды.