Астана. 8 қазан. BM.KZ – Шымкент қылмыстық істер жөніндегі мамандандырылған ауданаралық сотында алқабилер Шымкент ҰҚКД бастығының бұрынғы бірінші орынбасары Манат Сарбасовқа қатысты үкім шығарды. Іс бойынша үкімді судья Абинур Қарабаев оқыды
Манат Сарбасов 12 жылға сотталды, ол жазасын қауіпсіздігі орташа мекемеде өтейді. Сонымен қатар ҰҚК подполковнигі атағынан айырылды. Сонымен бірге екі бөлмелі пәтер мен Toyota Land Cruiser автокөлігі тәркіленуге жатады. Сондай-ақ пара мөлшерін өтеуі керек – 70 млн теңге.
Темірхан Варзиловқа 4 жылға бас бостандығын шектеу үкімі шығарылды.
Шыңғыс Жаңабаев 7 жылға бас бостандығынан айырылды.
Ерлан Тышқанбаев 5 жылға бас бостандығы шектеліп, сот залынан босатылды.
Айдос Сраилов ҚР ҚК-нің 304-бабы бойынша кінәлі деп танылып, бір жылға бас бостандығын шектеуге үкім шығарылды, оған қолданыстағы рақымшылық жасалды.
Айта кетейік, прокурор Шымкент ҰҚКД бастығының бұрынғы бірінші орынбасары Манат Сарбасовқа 12 жыл бас бостандығынан айыруды сұрады.
Сондай-ақ, бес адам – Шымкент Денсаулық сақтау басқармасының бұрынғы басшысы Темірхан Варзилов, оның қарамағындағы Шыңғыс Жаңабаев, кәсіпкер Ерлан Тышқанбаев, ҰҚКД майоры Айдос Сраилов және Сарбасовтың өзі сотталушылар отырысына қатысты.
Тергеу мәліметі бойынша, 2019-2020 жылдары Сарбасов Эльмира Дүйсенқызынан колледжге «қамқоршылық» жасағаны үшін 45 млн теңге, ал жекеменшік мектепке жәрдемдескені үшін тағы 70 млн теңге алған.
Айыптау мәліметтері бойынша, ол бұл ақшаға Шымкенттен екі пәтер мен автокөлік сатып алған. Содан кейін оның біреуін жөндеп, үш есе қымбатқа сатқан.
Прокурор Денсаулық сақтау басқармасының бұрынғы басшысы Темірхан Варзилов, Шыңғыс Жаңабаев және кәсіпкер Ерлан Тышқанбаевты медициналық жабдықтарды жеткізу және медициналық маскаларды жоғары бағамен сатып алу кезінде аса ірі мөлшерде бюджет қаражатын ұрлағаны үшін кінәлі деп тануды сұрады.
Айыптауды бағалау бойынша жалпы шығын 130 млн теңгеден асты.
Прокурор Варзилов пен Жаңабаевты 8 жыл, Тышқанбаевты 7 жыл бас бостандығынан айыруды сұрады.
Айдос Сраиловты тек заңсыз кәсіпкерлік қызметі үшін кінәлі деп тауып, рақымшылық жасау бойынша жауапкершіліктен босатуды ұсынды.