Астана. 9 қазан. BM.KZ – Түркияда шоу-бизнес пен қоғам қайраткерлеріне қатысты ауқымды тергеу басталды. Ыстамбұл прокуратурасы 19 танымал адамның есірткі заттарын қолдануы мүмкін деген күдікпен қылмыстық іс қозғағанын ресми түрде растады. Бұл туралы GazetaExpress хабарлады.
Құқық қорғау органдарының мәліметінше, тергеуге іліккен танымал тұлғалардың арасында әншілер Хадисе Ачикгез пен Ирем Деричи, актрисалар Демет Эвгар мен Беррак Тюзүнатач, блогерлер Дуйгу Озаслан және Дерин Талу бар.
Бұдан бөлек, түрік БАҚ-тары тергеу тізімінде Зийнет Сали, Кубилай Ака, Каан Йылдырым, Мерт Языджиоғлу, Метин Акдюльгер, Серен Морай, Өзге Өзпіринчжи, Энгин Полат, Дилан Полат, Зейнеп Мерич Арал, Бирдже Акалай және танымал адвокат Фейза Алтун сияқты есімдердің бар екенін хабарлады.
Оларды Ыстанбұлдағы жандармерияның Бас басқармасына және медициналық мекемелерге жеткізіп, талдау алынған. Қазіргі таңда ешкімге ресми айып тағылған жоқ. Тергеу аясында тексеріс пен жауап алу жүргізіліп жатыр. Егер сараптама нәтижесінде тыйым салынған заттардың бар екені анықталса, әр тұлғаға қатысты жеке қылмыстық іс қозғалуы мүмкін.
Прокуратура әзірге ешкімге қамауға алу туралы бұйрық шығармағанымен, тергеуге қатысы бар барлық адамдардан жауап алу жоспарланып отыр. Тергеу нәтижесі, ең алдымен, токсикологиялық сараптама мен өзге де заңды зерттеулердің қорытындыларына сүйенеді.
Түркия заңнамасына сәйкес, есірткіні жеке тұтыну түрме жазасына тікелей әкелмейді. Мұндай жағдайда сот емдеу, оңалту немесе уақытша бақылау шараларын тағайындауы мүмкін.
Аталған іс Түркияда үлкен қоғамдық резонанс тудырып, әлеуметтік желілерде кеңінен талқылануда. Себебі тергеуге іліккендердің көбі – елдегі ең танымал актерлер мен әншілер. Тергеу жалғасып жатыр, күдіктілер тізімі әлі де кеңеюі мүмкін.