Астана. 10 қазан. BM.KZ – Венесуэла халқының еркіндігі үшін күрескен саясаткер әйел Нобель иегері атанды, деп хабарлады Smartnews.
Венесуэлдік оппозициялық саясаткер Мария Корина Мачадо 2025 жылғы Нобель сыйлығының бейбітшілік аталымында жеңімпаз атанды.
Мачадо демократиялық қозғалыстың жетекшісі ретінде соңғы жылдары Латын Америкасындағы азаматтық батылдықтың ең жарқын үлгісін көрсетті деп бағаланды.
«Мария Корина Мачадо Венесуэла халқының демократиялық құқықтарын қорғау жолында табандылық танытып, елде бейбіт әрі әділ саяси өзгерістер орнауы үшін күресті», — делінген комитет мәлімдемесінде.
57 жастағы саясаткер қазіргі президент Николас Мадуро режимінің басты қарсыласы саналады. Ол 2011–2014 жылдары Венесуэла ұлттық ассамблеясының депутаты болған және 2012 жылғы президент сайлауына қатысқан.
Нобель комитетінің жетекшісі Йорген Ватне Фрюднес The Telegraph басылымына берген сұхбатында биыл үміткерлерден өтініш көп түскенін атап өтті. Бейбітшілік бойынша Нобель сыйлығын алуға АҚШ президенті Дональд Трамп та үмітті екені белгілі болған. Бірқатар БАҚ оның осы сыйлықты армандайтынын жазған.
Ол бірнеше соғысты тоқтатқанын үнемі айтып келеді. Оның номинациясын Израиль, Пәкістан, Камбоджа, Әзербайжан, Армения, Руанда, Габон басшылары қолдаған.
Бірқатар сарапшы оны марапаттау президенттің беделіне әсер етуі мүмкін екенін, ал оның бейбітшілік бастамалары сыйлыққа өтініш берудің соңғы күні — 2025 жылдың 31 қаңтарынан кейін жүргізілгенін алға тартқан.
Сыйлықты табыстау рәсімі дәстүр бойынша 10 желтоқсанда өтеді.