Шымкент. 21 қазан. BM.KZ – Бұрынғы халық қалаулысы, шымкенттік кәсіпкер Қуаныш Дәулетәлиевке қатысты сот екінші мәрте іздеу жариялады. Ол Ескендір Жамбаев түсірген жеке шағым бойынша Қылмыстық кодекстің «Қорлау» бабы бойынша айыпталып отыр. Жамбаевтың айтуынша, экс-депутат балағат сөздер айтып, ар-намысына тиген және қорқытқан.
«Балағаттап, ар-намысыма тиіп, қорқытып, қоқан-лоқы көрсетті. Себебі мен оның екі баласына қатысты алаяқтық дерегі бойынша арыз түсіргенмін. Сот әділ шешім шығарып, балалары жазаланды. Содан кейін маған жекеше кек сақтаған сияқты», – деді жәбірленуші.
Іс Шымкент қалалық қылмыстық істер жөніндегі ауданаралық сотында жабық режимде қаралып, үкім шығаруға жақындаған тұста айыпталушы сот отырысына себепсіз келмей қойған.
«Сот қаулы етті. 1976 жылы 2 желтоқсанда туылған Шымкент қаласы Қазығұрт мөлтек ауданы Төлебаева көшесінің тұрғыны Дәулетәлиев Қуаныш Әмірсейітовичке қатысты іздеу жариялансын. Ұсталғаннан кейін сотталушы Дәулетәлиев сот мәжілісіне қатысуы қамтамасыз етілсін, сотқа мәжбүрлі түрде жеткізілсін», – деді судья Асхат Есенов.
Судья Асхат Есеновтің айтуынша, айыпталушының белгісіз себептермен сот отырысына келмеуіне байланысты қылмыстық іс уақытша тоқтатылып отыр. Ол ұсталғаннан кейін қайта жаңартылып қаралады.
Сот отырысы 20 қазанда өтуі керек болған. Алайда сот кабинеті жүйесіндегі мәліметтерге сәйкес, сот экс-депутатты мәжбүрлеп жеткізу туралы қаулы шығарғанымен, тиісті қызметкерлер сотқа жеткізе алмады.
Естеріңізге сала кетейік, Қуаныш Дәулетәлиев бұған дейін Шымкент қалалық мәслихатының депутаты, «Ауыл» партиясының мүшесі болған. Мәслихаттағы қызметінде аталған партияның депутаттық фракциясын басқарған. Ресми мәліметке сүйенсек, мамандығы заңгер, алайда соңғы 25 жылда кәсіпкерлікпен айналысып келеді. Бұл азаматқа бұған дейін, яғни, 2 қыркүйек күні де іздеу жарияланған болатын.